Eki jyldyq úzilisten keıin búgin Sońǵy qońyraý dástúrli túrde ótedi
2022 jylǵy 25 mamyr 06:30

Eki jyldyq úzilisten keıin búgin Sońǵy qońyraý dástúrli túrde ótedi

NUR-SULTAN. QazAqparat – Búgin Qazaqstannyń barlyq mektebinde Sońǵy qońyraý rásimi eki jyldyq karantınnen keıin dástúrli túrde ótedi, dep habarlaıdy QazAqparat.

QR Bilim jáne ǵylym mınıstrliginiń habarlaýynsha, bıyl 170 myńnan astam túlek mekteppen qoshtasady. Onyń 8 myńnan astamy «Altyn belgi» tósbelgisine úmitker.

«Sońǵy qońyraý – muǵalimder men oqýshylar oqý jylynyń qorytyndysyn shyǵaryp, bilim alýshylardyń jetistigin atap ótetin kóńildi ári mańyzdy oqıǵa. Bıyl epıdemıologııalyq jaǵdaı mekteppen qoshtasý merekesin ótkizýge múmkindik berip otyr. Alaıda ol mindetti túrde mektep qabyrǵasynda uıymdastyrylýy kerek. Bilim berý uıymdary barlyq qajetti usynys pen nusqaýdy aldy. 2022 jyly elimizde 3,5 mln-nan astam oqýshy úshin sońǵy qońyraý soǵylady. Bıyl «Altyn belgi» tósbelgisine 8 139 túlek úmitker», - dedi mektepke deıingi jáne orta bilim komıtetiniń tóraıymy Gúlmıra Kárimova.

Respýblıkanyń barlyq jalpy bilim beretin mektebinde sońǵy qońyraý merekesin bir mezgilde ótkizý josparlanyp otyr. Mektep bitirý keshin bilim mekemesi ózi uıymdastyryp, ótkizýi kerek.

Sońǵy qońyraýda myna is-áreketke tyıym salynady:

– anımatorlardy, mereke agenttigin, ártisterdi, merekelik shara ótkizý úshin aqyly jeke stýdııalardy tartýǵa;

- merekelik dastarhan jaıýǵa;

– jalǵa beriletin avtokólikterdi tarta otyryp, qala (aýdan) boıynsha ekskýrsııa jasaǵa;

– mektep ákimshiligi men muǵalimderge syılyq alý úshin qarajat jınaýǵa;

- oıyn-saýyq mekemelerinde bitirý keshin uıymdastyrýǵa ruqsat joq.

Aıta keteıik, bıyl attestatty saltanatty tapsyrý rásimi 16-17 maýsymda ótedi.

Al 9 synyp oqýshylaryna emtıhan 28 mamyr men 6 maýsym kúnderi ótedi. Olar qazaq jáne orys tilderinen emtıhan tapsyrady jáne esse jazady. 31 mamyr kúni algebradan jazbasha emtıhan tapsyrady. Al 3 maýsym kúni orys tili qazaq mektebinde, qazaq tili orys mektebinde jazbasha ótedi. 6 maýsym kúngi sońǵy emtıhan tańdaǵan páni boıynsha jazbasha emtıhan uıymdastyrylady.

11 synyp oqýshylary, ıaǵnı mektep túlekteri 27 mamyr men 10 maýsym aralyǵynda emtıhan tapsyrady. Olarda birinshi emtıhan 27 mamyrda algebra jáne analız bastamalary páninen jazbasha, ekinshi emtıhan 30 mamyrda oqytý tilinde jazbasha ótedi. 2 maýsym kúni Qazaqstan tarıhynan aýyzsha emtıhan tapsyrady. 7 maýsymda orys tili qazaq mektebinde, qazaq tili orys mektebinde jazbasha bolady. Sońǵy emtıhan 10 maýsym kúni tańdaǵan páninen tapsyrady.

Sondaı-aq, kelesi jyldan bastap «Altyn belgi» úmitkerlerine talap kúsheıedi. Birinshiden, jalpy orta bilim beretin oqý baǵdarlamasyna sáıkes, 10, 11 synyptardaǵy oqý kezeńinde toqsandyq, jyldyq jáne qorytyndy baǵalary 5 bolýy kerek. Sondyqtan kelesi jyly 10, 11 synypta jyldyq jáne qorytyndy baǵa ǵana emes toqsandyq ta, jyldyq ta, qorytyndy da baǵa esepke alynady. Ekinshiden, jalpy orta bilimdi aıaqtaǵannan keıin Nazarbaev zııatkerlik mektepteriniń bazasynda algebra jáne taldaý negizderi oqý páni boıynsha qorytyndy atestattaýdan ótýi kerek. Úshinshi talap – úmitkerdiń negizgi bilim berý týraly úzdik atestaty bolýy tıis. ıAǵnı, ol 9 synypqa deıin úzdik oqýy kerek degen sóz.

Bilim granttaryna kelsek, 2022-2023 oqý jylynda memlekettik bilim tapsyrysynyń kólemi 88 myńnan asady. Onyń ishinde bakalavrıat – 73 myń, magıstratýra – 33 myńnan astam jáne doktorantýra – 1890 oryn.

Bıyl 42 myńnan astam memlekettik grant nemese 60 paıyzy tehnıkalyq mamandyqtarǵa bólinedi. Sonymen qatar 10 myń grant Atyraý men Mańǵystaý oblystarynyń tyǵyz ornalasqan eldimekenderiniń jastaryna qarastyrylyp otyr.

Sondaı-aq, «Serpin» baǵdarlamasy boıynsha 3653 grant bólindi . Odan bólek, 490 grant shetel azamattaryna beriledi. Onyń ishinde 150 grant Ortalyq Azııa elderiniń azamattaryna arnalady jáne 100 grant Islam yntymaqtastyǵy uıymy elderiniń túlekterine qaralǵan.


Uqsas jańalyqtar

Jańalyqtar

MURAǴAT