EAEO elderiniń eńbekshilerin zeınetaqymen qamsyzdandyrý týraly kelisim kúshine endi

NUR-SULTAN. QazAqparat - EAEO elderiniń eńbekshilerin zeınetaqymen qamsyzdandyrý týraly kelisim kúshine endi, dep habarlaıdy QazAqparat Biryńǵaı jınaqtaýshy zeınetaqy qorynyń baspasóz qyzmetine silteme jasap.

Uqsas jańalyqtar

Qazaqstandyqtardyń teń jartysy óz zeınetaqy jınaǵyn ınternet arqyly baqylaıdy

Zeınetaqy jınaǵyn emdelýge paıdalaný úshin ótinim qabyldaý bastaldy Qazaqstanda eń joǵary zeınetaqy 500 myń teńgeden asady Qazaqstanda eń tómengi kepildendirilgen zeınetaqyny kóterý josparlanǵan

Eýrazııalyq ekonomıkalyq komıssııanyń 2019 jyly 20 jeltoqsanda Eýrazııalyq ekonomıkalyq odaq memleketterimen birlesip ázirlegen odaqqa múshe memleketterdiń eńbekshilerin zeınetaqymen qamsyzdandyrý týraly kelisimi 2021 jyldyń 1 qańtarynan bastap kúshine endi.

«Kelisimge sáıkes eńbekshiler EAEO-ǵa múshe basqa memlekettiń aýmaǵynda eńbek nemese ózge de qyzmetti júzege asyrý arqyly zeınetaqy quqyqtary qalyptastyrylatyn ne qalyptastyrylǵan Qazaqstan, Reseı Federatsııasy, Qyrǵyzstan, Armenııa jáne Belarýs elderiniń azamattary esepteledi.

Kelisim Odaqtyń bir elinen ekinshi eline zeınetaqyny eksporttaý tártibi men tetigin aıqyndap, zeınetaqy alý quqyǵyn anyqtaý úshin EAEO memleketterindegi jumys ótilin jınaqtaýdy kózdeıdi», delingen habarlamada.

Qujat boıynsha jumysshyny medıtsınalyq kýálandyrý, onyń ishinde múgedektigi boıynsha zeınetaqy taǵaıyndaý barysynda syrttaı medıtsınalyq kýálandyrý máselesi retteldi.

«EAEO-ǵa múshe árbir memlekettiń eńbek etýshige zeınetaqynyń jumys kezeńinde jáne jumysqa ornalasqan eldegi zeınetaqy jarnalarynyń aýdarymdaryna barabar bóligin tóleıtinin eskere otyryp, 1 qańtardan bastap eńbekshiler EAEO-ǵa múshe memleketterde jumys berýshilermen eńbek qatynastaryn resmı resimdeýi, ıaǵnı mindetti túrde eńbek nemese azamattyq-quqyqtyq shartyn ýaqytyly jasaýy qajet.

Kelisimge sáıkes jınaqtaýshy zeınetaqyny, sondaı-aq, múgedektigi boıynsha jáne asyraýshysynan aırylý jaǵdaıy boıynsha eńbek (saqtandyrý) zeınetaqylaryn qospaǵanda, zeınetaqy alý quqyǵy eńbekkerdiń múshe memlekettiń aýmaǵynda jınaǵan keminde tolyq 12 aı jumys ótili bolǵan kezde (Kelisim kúshine engennen keıin), sol memlekettiń zańnamasyna sáıkes týyndaıtynyn atap ótken jón», delingen habarlamada.

Qazaqstanda kelisimdi iske asyrý jónindegi quzyretti organ BJZQ bolyp belgilengen. Soǵan sáıkes qorǵa eńbekshiler qajetti keńes alý úshin, al keıinnen jumys istegen kezeńderine qatysty zeınetaqy alý quqyǵyna ıe bolǵan múshe memleketterdiń quzyretti organdaryna jiberetin qujattarymen júgine alady. Qazaqstanda kelisim eńbekshilerdiń BJZQ-ǵa zeınetaqy jarnalaryn tóleý jónindegi quqyqtyq qatynastaryna qoldanylady.

«EAEO elderiniń eńbekshileri BJZQ-ǵa zeınetaqy jınaqtaryn qalyptastyrǵan jaǵdaıda, eńbekshilerdiń olardy alý quqyǵy Qazaqstan zańnamasyna sáıkes oryndalady:

- zeınetkerlik jasqa jetken kezde;

- eger múgedektigi merzimsiz bolyp belgilense, 1 jáne 2-toptaǵy múgedektik belgilengen kezde,

- al BJZQ-da zeınetaqy jınaqtary bar EAEO eliniń azamaty - eńbek etýshi qaıtys bolǵan jaǵdaıda, ony birjolǵy alý quqyǵy BJZQ-ǵa Qazaqstannyń zańnamasynda aıqyndalǵan quqyq belgileıtin qujattar usynǵan kezde onyń muragerlerine kóshedi», delingen habarlamada.

Aıta keterligi, EAEO-nyń biriktirilgen aqparattyq júıesi arqyly ózara tsıfrlyq is-qımylǵa kóshkenge deıin taraptar qaǵaz qujat aınalymyn paıdalanady.

Kelisimniń tolyq mátinimen Eýrazııalyq ekonomıkalyq komıssııanyń saıtynda tanysýǵa bolady.