EAEO elderi úshin qarjy pıramıdalarynyń biryńǵaı «qara tizimi» ázirlenbek
2022 jylǵy 24 qańtar 17:38

EAEO elderi úshin qarjy pıramıdalarynyń biryńǵaı «qara tizimi» ázirlenbek

NUR-SULTAN. QazAqparat – Eýrazııalyq ekonomıkalyq odaq (EAEO) elderi úshin qarjy pıramıdalarynyń biryńǵaı «qara tizimi» ázirlenbek. Bul týraly Májilis depýtattarynyń saýalyna QR Qarjy naryǵyn retteý jáne damytý agenttiginiń tóraǵasy Mádına Ábilqasymovanyń jaýabynda aıtylǵan, dep habarlaıdy QazAqparat tilshisi.

«2019 jylǵy 1 qazanda EAEO memleketteriniń basshylary EAEO-nyń ortaq qarjy naryǵyn qalyptastyrý tujyrymdamasyn qabyldaǵan bolatyn. Ol ortaq qarjy naryǵyn qalyptastyrýdyń negizgi maqsattaryn, mindetterin jáne negizgi baǵyttaryn aıqyndady. Tujyrymdamany iske asyrý aıasynda birqatar halyqaralyq kelisimdi ázirleý men qol qoıý kózdelgen. Kelisimder qarjy naryǵynyń zańnamasyn úılestirýge jáne tutynýshylardyń quqyqtaryn qorǵaýǵa baǵyttalǵan. Tujyrymdamanyń strategııalyq baǵyttarynyń biri ınvestorlar men jalpy qarjy naryǵyndaǵy qarjylyq qyzmetterdi tutynýshylardyń quqyqtary men múddelerin qorǵaýdy qamtamasyz etý bolyp sanalady

Onyń atap ótýinshe, tujyrymdamanyń 7-tarmaǵynda jalpy qarjy naryǵynda ınvestorlar men qarjylyq qyzmetterdi tutynýshylardyń quqyqtary men múddelerin qorǵaý aıasynda ulttyq retteýshilerdiń ókilettikteri sheńberinde qarjylyq alaıaqtyqtyń ártúrli nysandaryna jáne qarjy pıramıdalaryna qarsy is-qımyl boıynsha kelisilgen tásilderdi ázirleý kózdelgen. Tujyrymdamany iske asyrý EAEO keńesiniń №27 ókimimen bekitilgen Eýrazııalyq ekonomıkalyq odaqqa múshe memleketterdiń qarjy naryǵy salasyndaǵy zańnamasyn úılestirý jónindegi 2020 jylǵy 23 qarashadaǵy is-sharalar jospary aıasynda júzege asyrylady.

«Sonymen qatar, josparǵa sáıkes tutynýshylardyń quqyqtaryn qorǵaý jónindegi máselelerde EAEO-ǵa múshe memleketterde 2022-2025 jyldar kezeńinde qarjylyq qyzmetterdi tutynýshylardyń quqyqtary men múddelerin qorǵaý boıynsha úılestirilgen talaptardy ázirleý kózdeledi. Qazirgi ýaqytta Eýrazııalyq ekonomıkalyq komıssııa osy jylǵa arnalǵan jumys josparyn ázirleýde. Onyń aıasynda agenttik EAEO-ǵa múshe memleketter úshin biryńǵaı «qara tizimdi» jáne oǵan josyqsyz qarjy uıymdary men qarjy pıramıdalarynyń belgileri bar uıymdardy engizýdiń biryńǵaı ádistemesin jasaý máselesin engizýdi pysyqtaıtyn bolady», - dedi Mádına Ábilqasymova.


Jańalyqtar

MURAǴAT