EAEO elderi tranzıttik júk tasymalyn tolyǵymen elektrondyq formatqa kóshirmek

NUR-SULTAN. QazAqparat – Eýrazııalyq ekonomıkalyq odaqqa múshe memleketter tranzıttik júk tasymalyn tolyǵymen elektrondyq formatqa kóshirýdi kózdep otyr. Bul týraly OKQ-da ótken baspasóz máslıhatynda Qarjy vıtse-mınıstri Qanat Baedilov málim etti, dep habarlaıdy QazAqparat tilshisi.

«Búgingi tańda Eýrazııalyq ekonomıkalyq odaqqa múshe elderi birlesip, tranzıtti elektrondyq formatqa tolyq kóshirý júrgizilip jatyr. Tranzıttik júkterge onlaın rejımde monıtorıng júrgizý maqsatynda navıgatsııalyq plombalardy paıdalaný josparlanyp otyr. Jańa tehnologııalardy paıdalaný arqyly biryńǵaı tranzıttik júıeni durys qura otyryp, biz qazaqstandyq tasymaldaýshylarǵa ekonomıkalyq odaqtyń búkil aýmaǵy boıynsha tranzıt erkindigin qamtamasyz etemiz. Olar sanaýly kúnniń ishinde taýaryn esh kedergisiz jetkizýge múmkindigine ıe bolyp otyr», - dedi Qanat Baedilov.

Eske sala ketsek, buǵan deıin Janel Kúshikova Eýrazııalyq ekonomıkalyq odaq aıasynda qazaqstandyq kásipkerler qandaı kedergilermen betpe-bet keletinin aıtyp berdi.