Djo Baıden AQSh Prezıdenti laýazymyna kiristi

VAShINGTON. QazAqparat – Djo Baıden sársenbi kúni AQSh prezıdenti laýazymyna resmı kiristi. Al vıtse-prezıdent qyzmetin Kamala Harrıs atqarady. Osylaısha, ol bul laýazymǵa kelgen alǵashqy áıel boldy. Olar 20 qańtar kúni túste ótken ınaýgýratsııa rásiminde ant berdi, dep habarlaıdy QazAqparat «Golos Amerıkı» Jańalyqtar qyzmetine silteme jasap.

Bul joly prezıdentti ulyqtaý rásimi koronavırýs pandemııasyna baılanysty ádettegiden qarapaıym ótti. Kapıtolııden bastap Ulttyq saıabaq boıymen tizile turatyn júz myńdaǵan adamnyń ornyna AQSh shtattary men aýmaqtarynyń 200 myńnan astam Týy ilinip turdy.

Kapıtolııge ınaýgýratsııa rásimine kelmes buryn Djo Baıden áıeli Djıllmen jáne Kamala Harrıs kúıeýi Dag Emhoffpen birge Áýlıe apostol Matfeı soborynda duǵa oqý sharasyna qatysty. Bul shara bastalar aldynda prezıdent laýazymyn bosatyp jatqan Donald Tramp Aqúıden shyǵyp, tikushaqpen Florıdaǵa ushyp ketti. D.Tramp sońǵy 150 jylda óziniń izbasarynyń ulyqtaý rásimine qatysýdan bas tartqan AQSh-tyń alǵashqy basshysy bolyp otyr.

Inaýgýratsııaǵa eks-prezıdentter Barak Obama, kishi Djordj Býsh, Bıll Klınton jáne olardyń jubaılary Mıshel Obama, Lora Býsh jáne Hılları Klınton qatysty.

Sondaı-aq saltanatty rásimge laýazymynan ketip jatqan vıtse-prezıdent Maık Pens pen onyń jubaıy Karen Pens qatysty.

Ulyqtaý rásiminde óner kórsetken ánshiler Ledı Gaga jáne Djennıfer Lopes boldy. L.Gaga AQSh-tyń ulttyq ánuranyn oryndady.

Sharadan keıin Baıden men Harrıs Arlıngton ulttyq zıratyndaǵy Belgisiz soldat beıitine gúl shoqtaryn qoıý rásimine qatysatyny aıtylýda. Budan ári D.Baıden prezıdent retinde birqatar jarlyqtar men qaýlylarǵa qol qoıýdy josparlaǵan. Onyń komandasynyń málimetinshe, másele Dúnıejúzilik densaýlyq saqtaý uıymymen yqpaldastyqty qaıta jandandyrý, Klımat jónindegi Parıj kelisimine qaıta qosylý, birneshe musylman elderinen AQSh-qa kelýge tyıym salý týraly D.Tramptyń tapsyrmasynyń kúshin joıý, AQSh-ta násildik teń quqyqty qamtamasyz etý boıynsha úl úkimetiniń kúsh-jigerin belsendirý, bala kezinde Amerıkaǵa zańsyz kelgen azamattardyń quqyǵyn qorǵaýdy kúsheıtý týrasynda bolyp otyr. Sonymen qatar, D.Baıden el halqyn azamattyq patrıottyqqa shaqyryp, koronavırýs pandemııasy kezinde maska taǵýǵa úndeýdi josparlaýda.