Dúnıejúzilik banktiń Qazaqstandaǵy turaqty ókili taǵaıyndaldy
ASTANA. QazAqparat – Dúnıejúzilik banktiń Qazaqstandaǵy jańa turaqty ókil bolyp Andreı Mıhnev taǵaıyndaldy. Bul týraly QazAqparat atalǵan uıymnyń resmı saıtyna silteme jasap habarlaıdy.
Málim bolǵandaı, endi Andreı Mıhnev Dúnıejúzilik bank toby men Qazaqstan arasyndaǵy 2020-2025 jyldarǵa arnalǵan áriptestiktiń negizdemelik baǵdarlamasyn iske asyrýǵa jetekshilik etedi.
Baǵdarlama adamı kapıtaldy nyǵaıtyp, turaqtylyǵyn qamtamasyz etýge jáne tómen kómirtekti damýǵa baǵyttalǵan.
Andreı Mıhnevtiń ekonomıkalyq saıasatty júzege asyrý jáne jobalardy basqarý salasynda 20 jyldan astam tájirıbesi bar.
Ol bul taǵaıyndaýǵa deıin Taıaý Shyǵys pen Parsy shyǵanaǵy elderinde básekege qabilet pen jeke sektordy damytýǵa baǵyttalǵan baǵdarlamalardy basqarǵan.
Sonymen qosa, Andreı Mıhnev Latyn Amerıkasy, Ońtústik Azııa, Taıaý Shyǵys pen Soltústik Afrıka, Eýropa men Ortalyq Azııanyń kóptegen elderinde jumys istegen.
Andreı Mıhnev - Ýkraına azamaty. Ol «Halyqaralyq ekonomıka» boıynsha T.Shevchenko atyndaǵy Kıev ulttyq ýnıversıtetinde doktorlyq dárejesin alǵan.
Foto: vsemirnyjbank.org
