Dıplommen – aýylǵa: Jańaózenge barǵan muǵalimder kóterme qarajat almaǵan
2021 jylǵy 19 qarasha 22:51

Dıplommen – aýylǵa: Jańaózenge barǵan muǵalimder kóterme qarajat almaǵan

JAŃAÓZEN. QazAqparat – Mańǵystaý oblysynda «Dıplommen - aýylǵa» memlekettik baǵdarlamasymen Jańaózen qalasyna barǵan jekelegen muǵalimder kóterme qarajat almaǵan. Bul týraly oblys basshysy Nurlan Noǵaevtyń qalaǵa ekikúndik jumys sapary barysynda belgili boldy, dep habarlaıdy QazAqparat.

Mańǵystaý oblysy ákiminiń baspasóz qyzmetinen málim etkendeı, aımaq basshysy atalǵan máseleniń anyq-qanyǵyna jetýdi tapsyrdy.

Jańaózen qalasynyń áleýmettik-ekonomıkalyq damý jaǵdaıymen tanysýǵa arnalǵan sapardyń alǵashqy kúni N.Noǵaev Jańaózen qalasyna qarasty Tenge, Qyzylsaı, Kendirli aýyldaryndaǵy áleýmettik nysandardy aralap kórdi.

Jańaózen qalasynda mektepke degen suranys jyl saıyn artyp keledi. 2020 jyly – 33,6 myń oqýshy, 2021 jyly – 34,2 oqýshy bilim alsa, 2025 jyly qala mektepterinde oqıtyn oqýshylardyń sany 37 myńǵa artady dep josparlanýda. Mektepterdegi oryn tapshylyǵyn joıý maqsatynda «Shańyraq» shaǵynaýdanynda memlekettik-jekeshelik áriptestik sheńberinde 1 500 orynǵa arnalǵan smart mektep salý kózdelip otyr. Mektepte balalardyń damýyna jan-jaqty jaǵdaı jasalady, atap aıtqanda telestýdııa, oıyn bólmeleri, shyǵarmashylyq zertteýler úshin 3D prınteri, robototehnıka kabınetteri, temir men aǵash óńdeý sheberhanalary jumys isteıtin bolady. Joba quny – 4,8 mlrd teńge.

Qala mektepterinde maman tapshylyǵy bar. Búginde bilim oshaqtarynda matematıka, orys tili, aǵylshyn tili jáne tarıh pániniń muǵalimderi jetispeıdi. Oblys ákimi muǵalimdermen tildesý barysynda keı mektepterde «Dıplommen - aýylǵa» memlekettik baǵdarlamasymen kelgen mamandardyń úıli bolǵanymen, kóterme qarajatty almaǵany belgili boldy. Nurlan Noǵaev jaýapty azamattarǵa máseleniń anyq-qanyǵyna jetýdi tapsyrdy.

«Bul baǵdarlama elimizdegi jas mamandardy áleýmettik qoldaý jáne kadr tapshylyǵyn tómendetýge baǵyttalǵan. Osynyń arqasynda biz mektepterdi qajetti mamandarmen qamtyp otyrmyz. Bul baǵdarlamanyń árbir qatysýshysyna tıisti kóterme járdemaqy tólenip, baǵdarlamadaǵy jeńildikter men negizgi sharttardy túsindirý kerek. Ulttyń bolashaǵyna yqpal etetin ustazdar. Sondyqtan da pedagogtardy qoldaý bizdiń negizgi maqsatymyz bolyp qalady», - dedi Nurlan Noǵaev.

Qalany damytýdyń 2025 jylǵa deıingi keshendi jospary aıasynda birqatar medıtsınalyq nysan boı kóterýde. Osy jyldyń qyrkúıek aıynda Qyzylsaı aýylynda dárigerlik ambýlatorııa qoldanysqa berilse, jyl sońyna deıin Jańaózen qalasynda 50 oryndyq ozyq úlgidegi medıtsınalyq ortalyq ashylady. Nurlan Noǵaev emhananyń qurylysymen tanysyp, zamanaýı medıtsınalyq qural-jabdyqtarmen jumys isteıtin mamandardy qazirden daıyndaý kerektigin aıtty.

Sonymen qatar, aımaq basshysy Kendirli aýylynda salynyp jatqan 300 oryndyq mádenıet úıiniń qurylysymen tanysty. Joba «Aýyl – el besigi» memlekettik baǵdarlamasy boıynsha júzege asýda. Munda kórermen zaly, 14 myń kitap qory saqtalatyn kitaphana ornalasady. Nurlan Noǵaev qurylystyń qarqynyn baqylaýda ustaýdy tapsyrdy.

Jumys sapary barysynda oblys ákimi Qazaq gaz óńdeý zaýytynyń jumysymen tanysty. Aımaq suıytylǵan gazdy paıdalanatyn iri tutynýshylardyń biri. Oblys avtokólikteriniń 90 paıyzdan astamy suıytylǵan gazdy paıdalanady.

Óńirge negizgi gaz jetkizýshi - Qazaq gaz óńdeý zaýyty (QazGÓZ). Onyń tehnıkalyq qurylǵylary 90 paıyzǵa tozǵan. Zaýyttyń apattyq jaǵdaıda jıi toqtaýy halyqty otynsyz qaldyrýy múmkin. Osyǵan oraı, QazGÓZ bazasynda jańa gaz óńdeý zaýytyn salý máselesiniń keshiktirilýi ekonomıkalyq qana emes, áleýmettik qaýipti de tóndirýi yqtımal. Osyǵan baılanysty, oblys ákimi jaýapty tulǵalarǵa atalǵan máseleni únemi baqylaýda ustaýdy tapsyrdy.



Uqsas jańalyqtar
Seriktester jańalyqtary

Jańalyqtar

Úrdis

MURAǴAT