Dımash Qudaıbergen ulttyq onkologııa ortalyǵyna medıtsına jabdyqtaryn syılady
2022 jylǵy 2 naýryz 09:36

Dımash Qudaıbergen ulttyq onkologııa ortalyǵyna medıtsına jabdyqtaryn syılady

NUR-SULTAN. QazAqparat - Dımash Qudaıbergen qaıyrymdylyq uıymymen birlesip, Nur-Sultan qalasyndaǵy ulttyq ǵylymı onkologııa ortalyǵyna medıtsınalyq jabdyqtar men materıaldardy syıǵa tartty, dep habarlaıdy QazAqparat ánshiniń resmı saıtyna silteme jasap.

2021 jylǵy 16 qańtarda Dımash Qudaıbergen Tixr amerıkandyq platformasynda qaıyrymdylyq sıpaty bar Project C. U. R. E. kommertsııalyq emes uıymymen birge «Dimash Digital Show» onlaın-kontsertin ótkizdi.

Dımash pen project C. U. R. E. qaıyrymdylyq uıymynyń birlesken jumysynyń nátıjesinde Nur-Sultan qalasynyń ulttyq ǵylymı onkologııa ortalyǵyna medıtsınalyq jabdyqtar men materıaldar jetkizildi.

Medıtsınalyq ortalyqqa kereýetter, múmkindigi shekteýli jandarǵa arnalǵan arbalar, hırýrgııalyq bas kıimder, qolǵaptar, hırýrgııalyq maskalar, kózildirikter, betperdeler, N-95 halattar men maskalar berildi.

2022 jyldyń 21 aqpanynda «DimashAli» shyǵarmashylyq ortalyǵynyń jetekshisi Qanat Aıtbaev, «DimashNews» redaktsııasy jáne joba úılestirýshisi Qymbat Jaqypova «UǴOO» baryp, jetkizilgen júkti qarap, ortalyq qyzmetkerlerimen áńgimelesti.

«UǴOO» basqarma tóraǵasynyń birinshi orynbasary Qanat Syzdyquly Satybaev «DimashNews» tilshisine bergen suhbatynda:

«Qazirgi ýaqytta álemdegi epıdemıologııalyq jaǵdaıda onkologııalyq naýqastardy emdeýge arnalǵan jabdyqtar men materıaldardy ortalyq belsendi qoldanyp jatyr. Kereýetter palatalarǵa ornatylady, medıtsınalyq materıaldar qyzmetkerler men patsıentterdiń qaýipsizdigin qamtamasyz etýde», – dedi.

Koronavırýs ınfektsııasy bar onkogematologııalyq naýqastarǵa arnalǵan mamandandyrylǵan bólimde jumys isteý kezinde jeke qorǵanys quraldary erekshe ról atqarady.

Bul bólimshe «UǴOO» bazasynda ashyldy, óıtkeni mundaı patsıentterdi jalpy beıindegi statsıonarlarǵa jatqyzý onkologııalyq naýqastardaǵy nóldik ımmýnıtettiń saldarynan óte úlken qaýipke ıe.

Kezdesý qorytyndysy boıynsha Qanat Satybaev «UǴOO» atynan kórsetilgen gýmanıtarlyq kómek úshin alǵysyn jetkizdi.

Dımash Qudaıbergenge onyń jumysynda tabys tilep, aýyr syrqattyń saldarynan ómirde yntasyn joǵaltqan kóptegen patsıentter úshin shyǵarmashylyqqa baýlý óte mańyzdy sát bolyp tabylatynyn jáne adamdardyń ári qaraı ómir súrýine kómektesetinin atap ótti.

«Bul kómek biz úshin shynymen múmkin bolatyn kómek boldy. Joǵaryda aıtqanymdaı, bizdiń ortalyqtyń negizinde onkologııalyq naýqastarǵa arnalǵan COVID-bólimshesi ashyldy, sondyqtan biz olardy kovıdtik statsıonarǵa jibermeımiz jáne olar osynda emdeldi. Bizge osyndaı mindet qoıyldy, biz ony tolyǵymen iske asyrdyq jáne bizge berilgen gýmanıtarlyq kómekti qoldandyq. Biz bul múmkindikti naýqastarymyzdyń ıgiligi úshin odan ári paıdalanýdy jalǵastyramyz. Bir adamnyń ómirin qutqarý – úlken marapat» , – dedi Qanat Satybaev.

Ulttyq ǵylymı onkologııalyq ortalyq 2018 jyly quryldy jáne búgingi kúni Ortalyq Azııa óńiri elderinde onkologııa salasyndaǵy jetekshi ǵylymı ortalyq sanalady.

Onkologııa ortalyǵynda joǵary bilikti mamandar halyqaralyq standarttarǵa sáıkes patsıentterge onkologııalyq kómek kórsetedi, onkologııalyq isikter boıynsha operatsııalardyń barlyq túrlerin júrgizedi, sondaı-aq búırek pen baýyr aýystyryp salýdy júzege asyrady.

Qazirgi ýaqytta elordada joǵary tehnologııalyq jabdyqtarmen jabdyqtalǵan jańa onkologııalyq ortalyq salý jobasy iske asyrylýda, onda halyqaralyq tájirıbe belsendi paıdalanylady.

Ulttyq onkologııa ortalyǵynda eń ozyq tehnologııalar, sáýlelik, lazerlik, protondyq jáne ıadrolyq medıtsına bólimsheleri usynylatyn ǵylymı-zertteý zerthanalaryn, bilim jáne klınıkalyq bazany qamtıtyn halyqaralyq deńgeıdegi jetekshi ortalyqqa aınalady dep josparlanǵan.

Patsıentter Qazaqstan aýmaǵynda erte dıagnostıkadan bastap joǵary tehnologııalyq emdeý men ońaltýǵa deıingi medıtsınalyq kómektiń búkil keshenin shetelge shyqpaı-aq ala alady.


Seriktester jańalyqtary

Jańalyqtar

Úrdis

MURAǴAT