+7 (701) 759 90 19
USD 405.69 EUR 455.51
RUB 5.72 CNY 57.42
Jańalyqtar

Dımash Qudaıbergen: Men úshin mýzyka - matematıkadan da kúrdeli ǵylym

2020 jylǵy 24 mamyr 22:06
Bólisińiz:
Dımash Qudaıbergen: Men úshin mýzyka - matematıkadan da kúrdeli ǵylym

NUR-SULTAN. QazAqparat - Búgin Dımash Qudaıbergen Instagram paraqshasynda jankúıerlerimen qaýyshyp, olardyń suraqtaryna jaýap berdi. QazAqparat álemge tanymal ánshiniń suhbatyn nazarlaryńyzǵa usynady.

Uqsas jańalyqtar
Dımash Qudaıbergen Qytaıdyń tanymal platformasynda jeńimpaz boldy

- Jańa albomyńyz qashan jaryq kóredi?

- Jańa albom jazylý ústinde. Jaqynda tyńdarmandarǵa jol tartady dep úmittenemin. Albom jazý men úshin óte jaýapty, mańyzdy is. Jaıbaraqat, asyǵys-úsigis albom shyǵarý - meniń tabıǵatyma jat dúnıe. Sondyqtan ábden pisirip, oıymnan, júregimnen ótkizip baryp nazarlaryńyzǵa usynamyn. Karantın kezinde sizderdiń kózqarastaryńyz boıynsha bizdiń shyǵarmashylyq jumysymyz toqtap qalǵandaı bolyp kórinýi múmkin, biraq biz úıde daıyndalyp, jumys istep jatyrmyz.

- Kelesi kontsertińiz qashan bolady?

- Qazaqstanda eki jylda bir ret 2017 jáne 2019 jyly Arnau jáne Bastau dep atalatyn kontsertimdi tamashaladyńyzdar. Endigi kontsertim qashan, qaı jyly bolatyny belgisiz. Ózim qalamaǵandyqtan emes, karantın sııaqty ártúrli sebep bolyp qalýy múmkin. Jolymdy kesip, aldyn ala aıtpaıyn, onyń bári bolashaqtyń enshisinde.

- Ándi qalaı shyǵarasyz? Shabyt qalaı keledi?

- Men kompozıtsııa boıynsha magıstratýra bitirsem de, ózimdi kompozıtor sanamaımyn. Keıde áldebir áýen «kelip», ony dıktofonǵa jazýǵa nemese notaǵa túsirýge asyǵamyn. Shabyt kóbinese ushaqta keledi nemese túnde oıanyp, kontsertim qalaı ótetinin kóz aldyma elestetip jatam. Sol kezde de shabyt kelip, án jazylýy múmkin. Adam balasy jaqsyǵa da, jamanǵa da, ataqqa da, halyq mahabbatyna da tez úırenedi. Meni ata-anamnyń qýanyshy shabyttandyrady. Olardyń júzindegi qýanyshty kórgen saıyn taǵy da qýantqym kelip turady. Meniń ár kontsertim, jeńisim, alǵan marapatym olar úshin úlken baqyt, úlken mereke. Anamnyń qýanyshtan aqqan kóz jasyn kórgen kezde kelesi joly qalaı qýantarymdy oılap turamyn. Onyń osyndaı kúıine men ómir boıy boı úırete almaı ótetin sııaqtymyn.

- Ómirińizde bolǵan qyzyqty oqıǵany aıtyp bere alasyz ba?

- Men ózimdi joly bolǵysh adam sanaımyn. Soǵan dálel bola alatyn bir mysal: men basqa emes, dál osy otbasyda dúnıege kelgenim úshin qýanamyn. Jasym 26-ǵa kelse de ata-anam aqyl aıtyp, tárbıelep otyrady. Men ata-ana degende ata, ájemdi aıtyp otyrǵanymdy túsinetin shyǵarsyzdar. Qazaqtyń salt-dástúri boıynsha meni ómirge ákelgen ata-anam meni ata-ájemniń qolyna bergen, sondyqtan olardy da áke, ana dep atap kettim jáne kontsertterde de eki ata-anam bar ekenin aıtyp júremin. Sábıdi ata-ájege berýdiń tárbıelik máni zor, ol jas otbasy men ata-ene arasyn jaqyndatady, sonymen qatar ene men kelin arasynda dıplomatııalyq qarym-qatynas deýge bolady. Taǵy bir qyzyqty jaǵdaı: meni ómirge alyp kelgen ata-anam sahnada óner kórsetip bolǵan soń kórermen sahnaǵa shyǵyp, olardy quttyqtaıtyn. Men de ata-ájemmen birge kórermender qatarynda otyryp, kontsert aıaqtalǵan soń sahnaǵa shyǵyp, ortasynda turyp alyp, basymdy ızep, rahmet aıtatynmyn. Quddy bir kontsertti ákem, anam emes ózim berip tastaǵan sııaqtymyn. Bala kezimdegi osy sát meniń kóz aldymda qalyp qoıdy.

Taǵy bir qyzyqty jaǵdaı: ata-anamnyń aıtýy boıynsha, eń alǵash 2 jasymda sahnaǵa shyǵyppyn. 10 sekýndtyq epızodqa qatysýym kerek bolǵan, ıaǵnı sahnanyń bir jaǵynan shyǵyp, ekinshi jaǵyna júgirip ótýim kerek eken. Men bolsam sahnanyń ortasynda toqtap, halyqqa kóz almaı qarap qalyppyn. Olar qol shapalaqtaǵan kezde sahnadan tipten ketkim kelmeı qalǵan eken. Sodan keıin uıymdastyrýshylar meni sahnadan alyp ketpek bolyp, men olarǵa ustatpaı sahnany aınalyp qashqan ekenmin. Bul ata-anam aıtyp bergen jaǵdaı.

- Bolashaqta qandaı josparyńyz bar?

- Qazirgi jospar - keıinge shegerilgen kontsertterdi ótkizý. Jańa kontsert jumys kestesine enetin bolsa sizderge mindetti túrde habarlaıtyn bolamyz. Sizdermen qaýyshatyn sátti asyǵa kútip júremin.

- Kontsertten keıin qalaı qalypqa kelesiz?

- Kóbinese únsizdikte bolamyn. Kontsert aldynda da jalǵyz qalýdy jaqsy kórem, ol týraly meniń tobymda jumys isteıtinder jaqsy biledi.

- Ózge tilde án aıtqanda sózderin túsinesiz be?

- Men aldymen mýzyka tilin túsinýge tyrysamyn. Obrazǵa kirip, mýzykanyń sulýlyǵyn sezinemin, odan keıin meniń sezingenim kórermenge jol tartady. Mýzykanyń óz tili, óz kúshi bar. Men qazaq, orys tilin jáne azdap aǵylshyn tilin bilemin. Ánshi bolý ońaı dep oılaıtyndar qatelesedi. Mýzyka - ǵylym, kúrdeliligi jaǵynan matematıkadan qıyn bolmasa, ońaı emes. Men mýzykant retinde úırenerim kóp, mýzykanyń shegi joq.

- Alyp-qosaryńyz bar ma?

- Mundaı baqytqa kenelgen mende arman joq shyǵar. Nazarlaryńyzǵa myń márte alǵys aıtamyn, óıtkeni meniń shyǵarmashylyǵymdy baǵalaý arqyly sizder meni ǵana emes, meniń ata-ájemdi qýantyp jatyrsyzdar. Men úshin odan asqan baqyt joq. Árqaısysyńyzdyń otbasyńyzǵa Alla taǵala baq-bereke bersin. Oraza aıt qutty bolsyn!


Bizdiń kanalymyzǵa jazylyńyz:

Bólisińiz:

Avtor:

Zarına Qaharman

Zagrýzka...
Pikir qaldyrý
+7
Jiberý
Sondaı-aq... oqyńyz
Zagrýzka...
ONLAIN QYZMETKERLER
REDAKTOR
Gúlmıra Alıakparova
Gúlmıra Alıakparova
954-059
REDAKTOR
Janıbek Amangeldı
Janıbek Amangeldı
954-059
REDAKTOR
Aıdar Ospanalıev
Aıdar Ospanalıev
954-059

MURAǴAT