Depýtattardyń bastamasymen 27 zań jobasy ázirlendi
2022 jylǵy 30 maýsym 12:25

Depýtattardyń bastamasymen 27 zań jobasy ázirlendi

NUR-SULTAN. QazAqparat – Sessııa barysynda Parlament 27 halyqaralyq shart pen memleketaralyq kelisimdi ratıfıkatsııalady. Bul týraly búgin Parlament palatalarynyń birlesken otyrysynda Májilis tóraǵasy Erlan Qoshanov aıtty, dep habarlaıdy QazAqparat tilshisi.

«Sessııa barysynda depýtattardyń bastamasymen 27 zań jobasy ázirlendi. Olardyń 19-y qazirgi ýaqytta qabyldandy jáne 8 zań jobasymen jumys jalǵasyp jatyr. Depýtattar bastamashy bolǵan zańdardyń birqatary Memleket basshysynyń tapsyrmasyn oryndaýǵa baǵyttalǵan», - dedi E. Qoshanov jetinshi saılanǵan Parlamenttiń ekinshi sessııasynyń jumysyn qorytyndylaý kezinde.

Osy oraıda ol múgedektigi bar adamdardyń ómir súrý sapasyn jaqsartý máseleleri jóninde de zań qabyldanǵanyn eske saldy. Sonyń nátıjesinde 13 myńǵa jýyq ata-ana balalarynyń ońaltýdan ótýi kezinde birge turý men tamaqtanýǵa jumsalatyn shyǵystardyń 70 paıyzyna ótemaqy alady.

«Qorytyndylanyp otyrǵan sessııa barysynda Parlament eldiń syrtqy saıasattaǵy basym mindetterin iske asyrýdy bekitetin, shet eldermen jáne halyqaralyq uıymdarmen yntymaqtastyqty nyǵaıtýǵa baǵyttalǵan 27 halyqaralyq shart pen memleketaralyq kelisimdi ratıfıkatsııalady. Olardyń ishinen medıatsııa nátıjesinde qol jetkizilgen halyqaralyq tatýlasý kelisimderi týraly konventsııany, tolyq emes jumys ýaqyty jaǵdaılaryndaǵy jumys týraly konventsııany, Kaspıı teńiziniń teńiz ortasyn qorǵaý jónindegi negizdemelik konventsııaǵa hattamalardy erekshe atap ótkim keledi», - dedi Májilis tóraǵasy.

Onyń aıtýynsha, ótken sessııada depýtattyq saýaldarmen de kóptegen másele kóterildi. Parlament depýtattary Úkimet pen basqa da memlekettik organdardyń atyna 494 depýtattyq saýal joldady.

«Depýtattar 49 ret ótkizilgen «dóńgelek ústelde» kóptegen máselelerdi qarap-zerttedi. Olardyń arasynda aýyldyq eldi mekenderdi taza aýyz sýmen qamtamasyz etý, memleket kepildik bergen zań kómegin kórsetý, Ombýdsmenniń quqyqtyq mártebesi, qylmystyq qýdalaý jáne jazany oryndaý salasynda adam quqyqtaryn saqtaý, kásipkerlikke memlekettiń qatysýyn azaıtý jáne basqa da máseleler bar», - dedi ol.

«Ótken sessııada depýtattyq korpýstyń qyzmeti Úkimetpen tyǵyz baılanysta júzege asyryldy. Birlesken jumystyń tıimdiligin arttyrý úshin sessııa barysynda birneshe mınıstrlik pen vedomstvo basshylary depýtattardyń aldynda baǵdarlamalyq qujattardyń iske asyrylýy týraly baıandama jasady. Máselen, sessııa barysynda 14 úkimet saǵaty ótkizildi. Atqarylǵan is-sharalardyń naqty nátıjesi – parlamentarıılerdiń ulttyq jobalardy júzege asyrý tıimdiligin arttyrýǵa jáne halyqtyń ótkir problemalaryn sheshý tetikterin ázirleýge baǵyttalǵan keshendi usynystarynan turady», - dedi Májilis tóraǵasy.

Budan buryn habarlanǵandaı, Parlament depýtattary kanıkýlǵa ketti. E. Qoshanov ekinshi sessııanyń zańnamalyq kún tártibi aıtarlyqtaı mazmundy bolǵanyn aıtty.

«Máselen, Pralament palatalarynyń 4-shi birlesken otyrysy ótti. Májilistiń 42 jalpy otyrysy ótip, onda 271 másele qaraldy. Senattyń 42 jalpy otyrysy ótip, onda 148 másele qaraldy. Osy sessııa kezinde qos palatanyń jumysynda 127 zań jobasy boldy, onyń 78-i qabyldandy», - dedi Májilis tóraǵasy.

Sonymen qatar Erlan Qoshanov zań shyǵarý protsesindegi kemshilikterdi atady.


Uqsas jańalyqtar

Jańalyqtar

Úrdis

MURAǴAT