Depýtattar saýalyna Úkimet syrǵytpa jaýaptar beredi – Erlan Qoshanov
2022 jylǵy 30 maýsym 11:32

Depýtattar saýalyna Úkimet syrǵytpa jaýaptar beredi – Erlan Qoshanov

NUR-SULTAN. QazAqparat – Depýtattar saýalyna Úkimet standartty, syrǵytpa jaýaptar beredi. Bul týraly búgin Parlament palatalarynyń birlesken otyrysynda Májilis tóraǵasy Erlan Qoshanov aıtty, dep habarlaıdy QazAqparat tilshisi.

«Depýtattyq korpýstyń ózderiniń saýaldaryna beriletin jaýaptardyń sapasyna da kóńili tolmaı jatady. Saýaldarda biz, eń aldymen, saılaýshylarymyzdyń tilegi men amanatyn kóteretinimizdi túsiný kerek. Oǵan Úkimet pen basqa da memlekettik organdardan standartty, syrǵytpa jaýaptar keledi. Sondyqtan, memlekettik organdardyń depýtattyq saýaldarǵa aýyzsha jaýap berýin praktıkaǵa engizdik», - dedi E. Qoshanov.

Onyń aıtýynsha, aldaǵy ýaqytta depýtattar korpýsy men Úkimet músheleri zań sapasyn arttyrýda júıeli jumysty jolǵa qoıýǵa birlesip atsalysýy kerek.

«Ekinshi sessııany qorytyndylaı kele, qos palatanyń basqa eldermen jáne halyqaralyq uıymdarmen qarym-qatynasty nyǵaıtý jónindegi jumysynyń aýqymdylyǵyn atap ótken jón. Sessııa barysynda Parlament depýtattary 13 halyqaralyq parlamenttik uıym aıasynda belsendi jumys istedi, 360 halyqaralyq is-sharaǵa qatysty jáne sheteldiń 24 parlamentimen yntymaqtastyqty júzege asyrdy», - dedi Májilis tóraǵasy.

Budan buryn habarlanǵandaı, E. Qoshanov ekinshi sessııanyń zańnamalyq kún tártibi aıtarlyqtaı mazmundy bolǵanyn aıtty.

«Máselen, Parlament palatalarynyń 4-shi birlesken otyrysy ótti. Májilistiń 42 jalpy otyrysy ótip, onda 271 másele qaraldy. Senattyń 42 jalpy otyrysy ótip, onda 148 másele qaraldy. Osy sessııa kezinde qos palatanyń jumysynda 127 zań jobasy boldy, onyń 78-i qabyldandy», - dedi Májilis tóraǵasy.


Seriktester jańalyqtary

Jańalyqtar

Úrdis

MURAǴAT