Depýtat Ahmetov eldegi «saqaldy» qurylystar problemasyn kóterdi
2022 jylǵy 22 maýsym 12:46

Depýtat Ahmetov eldegi «saqaldy» qurylystar problemasyn kóterdi

NUR-SULTAN. QazAqparat – Májilis depýtaty Mádı Ahmetov QR Premer-Mınıstriniń orynbasary – Qarjy mınıstri Erulan Jamaýbaevtyń atyna joldaǵan saýalynda qurylysy ondaǵan jylǵa sozylyp ketken nysandardyń problemasyn birjola sheshýdi usyndy, dep habarlaıdy QazAqparat tilshisi.

«Ókinishke qaraı, elimizde qurylysy ondaǵan jylǵa sozylǵan jobalardyń sany azaıar emes. Basy bar, aıaǵy joq nysandardyń bastapqy quny jyl sanap eselep artýda», - deıdi depýtat.

Onyń paıymynsha, bul – halyqtyń salyǵynan jınalǵan mıllıardtaǵan qarjy tıimsiz ıgerilip jatqanynyń aıqyn kórinisi.

«Aımaqtardaǵy jobalardyń birine qarjy jetpese, biriniń merdigeri jaýapsyz. Saldarynan eki ortada jurtshylyq ábigerge túsip, bılik pen buqaranyń ortasynda túsinispeýshilik týyndaýda. Úkimet qurylysy jyr bolǵan nysandardy aıaqtaýdyń ornyna jyl saıyn jańa jobalardy qarjylandyrýyn toqtatar emes.

Áli kúnge deıin elimiz boıynsha aıaqsyz qalǵan jobalardyń naqty tizimi joq. Ulttyq ekonomıka, Qarjy mınıstrlikteri men aımaqtyq ákimdikter usynǵan aqparat bir-birine kereǵar, múlde saı kelmeıdi. Jergilikti ákimdikter usynǵan málimetterge sáıkes Qaraǵandy oblysynda 27 nysan, elordada 16, Túrkistan oblysynda 11, Mańǵystaý oblysynda 10 nysan turalap, «saqaldy» qurylystyń kóshin bastap tur. Olardyń kóbi halyq ıgiligine jaraıtyn áleýmettik nysandar, ıaǵnı balabaqsha, emhana men mektepter», - dedi depýtat.

Sondaı-aq ol atalǵan máseleniń sheshilýine áser etetin birneshe usynys aıtty. Olar:

- el aýmaǵyndaǵy qurylysy ondaǵan jylǵa sozylǵan nysandardyń naqty ári júıeli tizimin tez arada jasaqtaý;

- turalap qalǵan ár nysan, onyń ishinde áleýmettik obektilerdi aıaqtaý boıynsha is-áreket josparyn daıarlaý;

- aýqymdy, qarajatty kóp qajet etetin jobalar boıynsha arnaıy ınvestıtsııalyq usynymdardy daıarlaýdy pysyqtaý.

Buǵan deıin Ulttyq ekonomıka mınıstri Álibek Qýantyrov eldiń 15 óńirinde qurylys qarqyny artqanyn málim etken edi.


Uqsas jańalyqtar
Seriktester jańalyqtary

Jańalyqtar

Úrdis

MURAǴAT