Densaýlyq saqtaý nysandaryna 20 shabýyl jasaldy – DSM
NUR-SULTAN. QazAqparat – Eldegi tótenshe jaǵdaı rejımi kezinde qaıtys bolǵan 225 adamnyń 175-i medıtsınalyq uıymdarda kóz jumǵan. Bul týraly QR Densaýlyq saqtaý mınıstrligi qoǵammen baılanys departamentiniń dırektory Ásel Artakshınova málim etti, dep habarlaıdy QazAqparat tilshisi.
«Elde Tótenshe jaǵdaı engizilgen sátten bastap 2678 zardap shegýshi medıtsınalyq kómekke, onyń ishinde 1815-i ambýlatorııalyq kómekke júgindi. Statsıonarlyq em alǵan 863 adamnyń 598-i shyǵaryldy, 265 emdeýdi jalǵastyrýda. 67 naýqas aýyr halde reanımatsııada jatyr. 500-den astam kúrdeli hırýrgııalyq operatsııa jasaldy. Bas prokýratýra málim etken qaıtys bolǵan 225 adamnyń 175-i medıtsınalyq uıymdarda kóz jumdy», - dedi DSM ókili.
Sondaı-aq, ol osy kezeńde densaýlyq saqtaý nysandaryna 20 shabýyl jasalǵanyn aıtty.
«Densaýlyq saqtaý nysandaryna 20 shabýyl jasaldy. Onyń ishinde Almaty qalasynda 5 statsıonarǵa, 1 medıtsınalyq-sanıtarııalyq alǵashqy kómek nysanyna jáne 14 dárihanaǵa, Almatyda 5 medıtsına qyzmetkerine, Shymkent qalasy men Almaty oblysynda bir-bir medıtsına qyzmetkerine shabýyl jasaldy. Almaty qalasynda – 31, Shymkentte – 7, Almaty oblysynda – 5, Jambyl oblysynda – 2, jalpy sany 45 jedel medıtsınalyq járdem avtokóligi zardap shekti. Onyń ishinde 4 avtomobıl jóndeýge kelmeıdi», - dedi Ásel Artakshınova.
Mamannyń aıtýynsha, Almatynyń úsh medıtsınalyq klınıkasy shamamen úsh táýlik boıy qorshaýda bolǵan.
«Almaty qalasynyń úsh medıtsınalyq klınıkasy - 1, 7 jáne 12 qalalyq aýrýhanalar shamamen úsh táýlik boıy terrorıstermen qorshaý jaǵdaıynda boldy, bul rette qyzmetkerler bul kezeńde aýysymsyz, birneshe táýlik boıy jumys istedi. Naýqastar úshin azyq-túlik jetkizilmedi, dárigerler patsıentterge tamaq daıyndady.
Keıbir zardap shekkender dárigerlerdiń suraqtaryna túsinbegen jáne memlekettik jáne orys tilderinde jaýap bermegen, medıtsınalyq kómek alǵannan keıin medıtsınalyq uıymdardan ruqsatsyz ketip, tipti belgisiz qarýly adamdardyń súıemeldeýimen reanımatsııadan shyqqan jaǵdaılar boldy.
Qazirgi ýaqytta respýblıkanyń barlyq medıtsınalyq uıymdary, onyń ishinde Almaty qalasy boıynsha da shtattyq rejımde jumys isteıdi», - dep túıindedi DSM ókili.
