Jańalyqtar  >
Daýylda áriptesterin qutqaryp júrip mert bolǵan jaýynger marapatqa usynyldy
2022 jylǵy 10 tamyz 20:00

Daýylda áriptesterin qutqaryp júrip mert bolǵan jaýynger marapatqa usynyldy

NUR-SULTAN. QazAqparat – Daýylda áriptesterin qutqaryp júrip kóz jumǵan Ulttyq ulannyń jaýyngeri Almas Shahımov marapatqa usynyldy. Bul týraly Ulttyq ulannyń baspasóz qyzmetinen málim boldy, dep habarlaıdy QazAqparat tilshisi.

Aıta keteıik, qaıǵyly oqıǵa keshe Almaty oblysyndaǵy 5571 áskerı bóliminde bolǵan.

Vedomstvo dereginshe, 1-jedel maqsattaǵy batalonnyń jeke quramy dalalyq jattyǵýda júrgende daýyl kóterilip, sarbazdar ornalasqan shatyr buzyla bastaǵan.

Osy ýaqytta qatardaǵy jaýynger A.N. Shahımov áriptesteriniń qaýipsiz orynǵa shyǵýyna kómektesip júrip, basyna shatyrdyń temir jaqtaýy tıip, jaraqat alǵan.

Oǵan dereý alǵashqy medıtsınalyq kómek kórsetilgen. Degemen ony ajaldan aman alyp qalý múmkin bolmady.

«Jaýynger A.N.Shahımov óziniń qarýlastaryn qutqarý barysynda janqııarlyq tanytyp, mert boldy. Marumnyń denesi Almatydan Kókshetaýǵa áskerı bortpen jiberiletin bolady. Jaýyngerdiń ata-anasyna zańnamaǵa sáıkes, 500 AEK (1 531 500 teńge) jáne 80 AEK (245 040 teńge) materıaldyq kómek kórsetiledi. Sondaı-aq, Almas Shahımov marapatqa usynylady», - delingen quzyrly organ taratqan habarlamada.

Ulttyq ulan aqparatyna saı, jaýynger Almas Shahımov 2003 jyly týǵan.

Aqmola oblysy Kókshetaý qalasynyń qorǵanys isteri jónindegi departamentimen 2022 jyldyń kókteminde shaqyrylǵan.

Eske sala ketsek, Almas qaza tapqan daýyl kezinde taǵy 14 áskerı qyzmetshi jaraqat alǵan. Olarǵa tıisti medıtsınalyq kómek kórsetilgen.


Uqsas jańalyqtar
Seriktester jańalyqtary

Jańalyqtar

Úrdis

MURAǴAT