Dáýren Abaev Almaty qalasyndaǵy mádenıet nysandaryn aralady
2022 jylǵy 29 qańtar 15:30

Dáýren Abaev Almaty qalasyndaǵy mádenıet nysandaryn aralady

NUR-SULTAN. QazAqparat – QR Mádenıet jáne sport mınıstri Dáýren Abaev Almaty qalasyndaǵy mádenıet nysandaryn aralady, dep habarlaıdy QazAqparat tilshisi.

«Búgin QR Mádenıet jáne sport mınıstri Dáýren Abaev Jambyl atyndaǵy Qazaq memlekettik fılarmonııasyna, Qazrestavratsııaǵa, Ulttyq kınony qoldaý memlekettik ortalyǵyna, Qazaqstan Respýblıkasynyń Ortalyq memlekettik mýzeıine, Qurmanǵazy atyndaǵy Qazaq ulttyq konservatorııasyna, Muhtar Áýezov atyndaǵy Qazaq ulttyq drama teatryna, M.Lermontov atyndaǵy memlekettik akademııalyq orys drama teatryna, Sh. Aımanov atyndaǵy «Qazaqfılmge», QR Memlekettik akademııalyq bı teatryna jáne Respýblıkalyq akademııalyq nemis drama teatryna bardy», - delingen atalǵan mınıstrliktiń baspasóz qyzmeti taratqan aqparatta.

Vedomstvo málimetinshe, ol mınıstrlikke baǵynysty uıymdardyń ujymdarymen kezdesip, áńgimelesti. Sonymen qatar qańtar oqıǵasy kezinde mádenıet oshaqtaryna keltirilgen zalaldy qarap shyqty.

Kezdesý barysynda mınıstr qandaı jaǵdaı bolmasyn, Almaty árqashan elimizdiń mádenı astanasy bolyp qala beretinin atap ótti.

«Qalanyń mýzeı, arhıv, kitap qorlarynyń baılyǵy, teatr jáne kontserttik repertýarlardyń alýan túrliligi, qalada jasampaz jastardyń, óner salasy qyzmetkerleriniń shoǵyrlanýy – árqashanda bolǵan jáne jalǵasyn taba beredi. Endigi jerde biz eki ese kúsh- jigermen ońtústik astananyń mádenı landshaftyn damytý men túrlendirýge jumys isteýge tıispiz. Bul iste sizderdiń kómekterińiz, qoldaýlaryńyz sózsiz qajet»,- dedi D. Abaev mádenıet nysandarynyń qyzmetkerlerine arnaǵan sózinde.

Sonymen qatar kezdesý barysynda mekeme basshylaryna birqatar naqty tapsyrmalar berildi. Atap aıtqanda, baı dástúr men jyldar boıy qalyptasqan repertýardy jańa tásildermen, shyǵarmashylyq eksperımenttermen, jas rejısserlerdiń, stsenarısterdiń, dramatýrgterdiń, kompozıtorlardyń jańa tolqyn ókilderimen yntymaqtastyqpen baılanystyrý qajet ekendigi aıtyldy.

Osy turǵyda Mınıstr teatr men kınonyń tereń maǵynalyq, ıdeologııalyq mánine erekshe nazar aýdardy.

«Búgin bizdiń aldymyzda elimizdiń jastary úshin oń róldik modelderdi qalyptastyrý baǵytynda mańyzdy mindet tur. Jańadan kúrdeli dúnıeni oılap tabýdyń qajeti joq. Munyń bárin Uly aqyn, dana oıshyl, qazaqtyń jańa tarıhı dáýirdegi realıstik jazba ádebıetiniń atasy Abaı Qunanbaıuly áldeqashan aıtyp ketken. Uly aqynnyń ǵıbratty sózderi jáne danalyq uıyǵan oılary men tujyrymdamasy barlyq qajettilikti qamtıdy – táýelsizdik, adaldyq, ózin-ózi jetildirýge degen umtylys, ádilettilik pen adamgershilik sezimderi. Bul qundylyqtardy otandyq fılmder men spektaklderdiń sıýjettik jelisine engizý qajet»,- dep atap ótti mınıstr.

Sonymen qatar Muhtar Áýezovtiń týǵanyna 125 jyl mereıtoıyn laıyqty deńgeıde atap ótý, Uly prozaıktiń esimimen atalatyn drama teatr ǵımaratyna kúrdeli jóndeý júrgizý jóninde jeke tapsyrmalar berildi.

Jambyl atyndaǵy fılarmonııada mınıstr «Otyrar sazy» orkestriniń 40 jyldyǵy men 2025 jyly Nurǵısa Tilendıevtiń 100 jyldyǵyn merekeleý máselesin talqylaýdy usyndy.

«Qazaqfılmdi» aralaý barysynda mınıstr kınofabrıkany jańǵyrtý jumystarynyń barysymen tanysyp, «Uly dala tańy» fılminiń kórsetilimine qatysty.


Jańalyqtar

MURAǴAT