Dárigerlerdiń jalaqysy 2023 jylǵa deıin eki esege ósedi - mınıstrlik

NUR-SULTAN. QazAqparat – 1 qańtardan bastap dárigerlerdiń jalaqysy orta eseppen 30%, orta medıtsınalyq qyzmetkerleriniń eńbekaqysy 20% ósti. Bul týraly QR Densaýlyq saqtaý mınıstrliginiń jaýapty hatshysy Botagóz Jaqselekova aıtty, dep habarlaıdy QazAqparat tilshisi.

«2019 jyldyń qańtar aıynda Elbasynyń tapsyrmasymen dárigerlerdiń eń tómengi jalaqy mólsheri bir jarym esege - 28 myńnan 42 myń teńgege ósti. Sonymen qatar, ótken jyldyń maýsym aıynda medıtsınalyq qyzmetkerlerdiń jalaqy mólsheri taǵy 30% ósti. Prezıdenttiń 19 maýsymdaǵy buıryǵyna sáıkes, 2020 jyldyń 1 qańtarynan bastap dárigerlerdiń jalaqysy orta eseppen 30%, orta medıtsınalyq qyzmetkerler eńbekaqysy 20% ósti», - dedi QR Densaýlyq saqtaý mınıstrliginiń jaýapty hatshysy Botagóz Jaqselekova mınıstrlikte ótken jıynda.

Jalaqy Tegin medıtsınalyq kepildendirilgen kómek sheńberinde jáne Mindetti áleýmettik medıtsınalyq saqtandyrý júıesinde qarjylandyrylatyn densaýlyq saqtaý uıymdary qyzmetkerleriniń biliktiligine baılanysty esepteledi.

«Sondaı-aq, mindetti áleýmettik medıtsınalyq saqtandyrý jáne qyzmet jetkizýshi arasynda kelisimsharttar jasadyq. Aldaǵy ýaqytta ujymdyq kelisimsharttarǵa ózgertýler men tolyqtyrýlar engiziledi dep kútilýde jáne medıtsınalyq qyzmetkerlerge jalaqynyń ýaqytyly berilýi qoǵamdyq baqylaýǵa alynady. 2023 jylǵa deıin dárigerler jalaqysy kem degende eki ese ósedi», - deıdi ol.