+7 (701) 759 90 19
USD 435.54 EUR 473.08
RUB 5.76 CNY 61.64
Jańalyqtar

Darıǵa Nazarbaeva: Elektr energetıkasyn basqarýdaǵy qatelikter ár otbasyna shyǵyn bolyp otyr

2020 jylǵy 19 aqpan 19:03
Bólisińiz:
Darıǵa Nazarbaeva: Elektr energetıkasyn basqarýdaǵy qatelikter ár otbasyna shyǵyn bolyp otyr

NUR-SULTAN. QazAqparat – QR Parlamenti Senatynyń tóraǵasy Darıǵa Nazarbaeva elektr energetıkasy salasynyń jumysy men halyqty elektrmen úzdiksiz qamtamasyz etý máseleleri boıynsha jumys kezdesýin ótkizdi, dep habarlaıdy QazAqparat Senattyń baspasóz qyzmeti silteme jasap.

Kezdesýge Senat depýtattary, Energetıka mınıstri Nurlan Noǵaev, Indýstrııa jáne ınfraqurylymdyq damý mınıstrliginiń ókilderi, sondaı-aq «KEGOC», «Samuryq-Energo» jáne «Astana AEK» aktsıonerlik qoǵamdarynyń basshylary qatysty.

Darıǵa Nazarbaeva kezdesýdiń mańyzyna toqtala kelip, ótken jyldyń qarasha aıynda Nur-Sultan qalasynda elektr energııasy birneshe márte óship qalǵanyn eske saldy.

«Qalanyń bir bóligi elektr jaryǵynsyz qaldy, onyń sebebin bilý ári túsiný úshin memlekettik ýákiletti organdardy tyńdaǵymyz keledi. Sol jaǵalaýdyń kommýnıkatsııalary men ınfraqurylymy jaqynda salynǵan, olardy kónerdi nemese apatty jaǵdaıda dep aıtýǵa bolmaıdy», - dedi ol.

«Astana AEK» Basqarma tóraǵasy Serik Balqyshev baıandamasynda tutynýshylardy elektrmen jabdyqtaýdaǵy uzaq úzilisterge dýshar etken aqaýlarǵa monıtorıng nátıjeleri ıesiz jeliler men qosalqy transformatorlyq stansalar negizgi sebep ekenin aıtty.

«Astana AEK» basshysynyń aqparaty boıynsha, qurylys kompanııalary kóp páterli turǵyn úı keshenderin paıdalanýǵa bergennen keıin úı ishindegi ınjenerlik kommýnıkatsııalardy qyzmet kórsetetin kompanııalarǵa tapsyrady.

«Syrtqy elektr jelileri ıesiz qalady, olarǵa tıisti qyzmet kórsetilmeıdi ári kúzetilmeıdi, sonyń nátıjesinde qosalqy stansalardyń jabdyqtary buzylady ári isten shyǵady. Mundaı jelilerdegi apattar turǵyn úı keshenderine elektr berýde úzilisterge dýshar etedi, ol tirshilikti qamtamasyz etý júıelerine, ásirese jylytý kezeńinde óte qolaısyz áser etedi. Qazirgi ýaqytta syrtqy ınjenerlik jelilerdi mamandandyrylǵan qyzmet kórsetetin uıymdarǵa berý máselesi normatıvtik-quqyqtyq aktilermen rettelmeı keledi», - dedi ol.

Senat depýtattary talqyǵa belsendi qatysty. Senator Serik Jaqsybekov tehnıkalyq sharttardy berý rásimderi men salalyq erejede bir jelide apatty jaǵdaı bolǵanda basqa jelige aýystyrý sharalarynyń bolýy týraly suraq qoıdy.

Darıǵa Nazarbaeva talqylaý barysynda ıesiz jańa jelilerdiń paıda bolýynyń aldyn alý máselesine erekshe nazar aýdardy.

«Qazir bul basty mindet, áıtpese ol jumys eshqashan aıaqtalmaıdy. Kásipkerlik kodeksti qaraýǵa asa muqııat oralýymyz kerek, óıtkeni biz qandaı máselelerdi qarastyrsaq ta, baqylaýdyń joqtyǵy problemasyna udaıy tap bolamyz, tıisinshe memleket sapaǵa jaýap bere almaı otyr. Jalpy alǵanda, tehnologııalyq tizbektiń bári tıimsiz bolyp shyǵady, ol kez kelgen ýaqytta adamdardyń densaýlyǵy men ómirine zııan keltirýi múmkin», - dep atap ótti D.Nazarbaeva.

Saladaǵy jaǵdaıǵa depýtat Muhtar Qul-Muhammed te túsinikteme berdi. «Aımaqtarda jumys istegender bul máselelerdiń qalaı paıda bolǵanyn jaqsy biledi. Investor keledi de búkil aımaqtyq jelini menshikke satyp alady, áıtse de oǵan aqsha salýǵa óziniń múmkindigi bolmaıdy, ákimdikterdiń de qolynan kelmeıdi, óıtkeni olardyń menshigi emes, osyndaı jaǵdaıda ıesiz jeliler paıda bolady», - dedi M.Qul-Muhammed.

D.Nazarbaeva óz kezeginde elektr energetıkasy salasyn ákimshilendirýdegi sapanyń tómendigine nazar aýdardy. «Baqylaý joq, kásiporyn zań men normatıvtik-quqyqtyq aktilerdi adal oryndaýy úshin monıtorıng jasaý kerek. Retteý quramy da joq. Shyǵyndar bárimizdiń qaltamyzdan tólenedi, esep-shot kelgen kezde oılanbastan tóleı salamyz. Ár úı, ár otbasy osy esep-shottardy tólep keledi. Investıtsııalyq tarıfterdi kóterýge de kelisip otyrmyz, degenmen ınvestıtsııalarǵa júıeli baqylaý da, olardyń qaıtymy men tıimdiligi de joq», - dep atap ótti D.Nazarbaeva.

Senat basshysy sonymen qatar bizdiń elimizdegi kómir men gazdy paıdalaný máselesin de kóterdi. «Bizdiń mańyzdy saýalymyz – kómir shahtalary ne bolady? Memleket qazirgi kezde eksportqa shyǵatyn gazdan jaqsy dıvıdendter taýyp otyr. Іshki naryqta paıdalaný kezinde kómir men gaz arasynda tepe-teńdik bolýy tıis jáne kómirge negizdelgen energetıka ekologııalyq taza bolýy ári qaraı da paıda ákelýi, al kómir shahtalaryndaǵy jumysshylar jumysyn joǵaltpaýy úshin kómir bar jerde qazirgi zamanǵy jańa tehnologııalardy engizý qajet. Bul úlken másele, biraq ol esh jerde kóterilmeı keledi», - dedi D.Nazarbaeva.

Senat tóraǵasy kezdesýdi qorytyndylaı kelip, aıtylǵan barlyq usynystardyń jınaqtalatynyn jáne olar boıynsha únemi jumys júrgiziletinin atap ótti.



Bizdiń kanalymyzǵa jazylyńyz:

Basty sózder: Senat, Energetıka,
Bólisińiz:
Zagrýzka...
Pikir qaldyrý
+7
Jiberý
Sondaı-aq... oqyńyz
Zagrýzka...
ONLAIN QYZMETKERLER
REDAKTOR
Kojakeldıev E.
Kojakeldıev E.
954-059
REDAKTOR
Gúlmıra Alıakparova
Gúlmıra Alıakparova
954-059
REDAKTOR
Aıdar Ospanalıev
Aıdar Ospanalıev
954-059

MURAǴAT