+7 (701) 759 90 19
USD 425.37 EUR 492.66
RUB 5.97 CNY 66.15
Jańalyqtar

COVID-19: Elimizdegi 240 naýqastyń jaǵdaıy nashar

2020 jylǵy 16 jeltoqsan 00:22
Bólisińiz:
COVID-19: Elimizdegi 240 naýqastyń jaǵdaıy nashar

NUR-SULTAN. QazAqparat - Álemdi ábigerge salǵan COVID-19 qazaq eliniń de qabyrǵasyna qatty batty. Ala jazdaı arqandalǵan buzaýdaı aýlasynan uzaı almaǵan jurtty kórdik. Qanshama kásipkerdiń jumysy toqtap, tabysynan qaǵyldy. Osynyń bári eldiń áleýmettik-ekonomıkalyq ahýalyna keri áserin tıgizdi. Ekpini basylmaı turǵan indettiń zardaby men saldary da qıyn bolyp tur. Bas aman bolsa bári ornyna keler degen úmit oty sónbesi anyq. Degenmen, eldegi qazirgi ahýaldy bir sholyp kórsek.

Uqsas jańalyqtar
Atyraý oblysynda ınfektsııalyq statsıonarlarda 212 naýqas jatyr SQO-da bir aıdyń ishinde 70-ke jýyq adam koronavırýstan qaıtys boldy Almatyda koronavırýs juqtyrǵandar sany azaıdy

Dál búgingi tańda koronavırýs ınfektsııasynan 13 998 adam em alyp jatyr. Olardyń arasynda 1 041 bala bar. Statsıonarlarda 4 139 naýqas jatyr, 21 828 adam ambýlatorııalyq jaǵdaıda emdelýde. Jalpy naýqastardyń arasynda 240 adamnyń jaǵdaıy nashar eken. Sonyń ishinde 35 naýqastyń jaǵdaıy óte aýyr dep baǵalanǵan. 40 naýqas ókpeni jasandy jeldetý apparatynda jatyr. Bul naýqastardyń tezirek saýyǵyp ketýine tilekshimiz.

Alda Táýelsizdik merekesi men jańa jyl merekesi kele jatyr. Biraq, bıyl bul merekelerdi otbasynda, oshaq qasynda atap ótkennen abzaly joq. Elirip el aralap ketetin tentekter bolsa tezge salatyndar da bar ekenin umytpaý kerek. Mereke kúnderi karantın rejıminiń buzylmaýyn qadaǵalaıtyndar men anyqtaıtyn mobıldi toptyń jumysy kúsheıtiledi. Mysaly, keıingi táýlikte Nur-Sultan qalasynyń sanıtarlyq-epıdemıologııalyq baqylaý basqarmalaryna polıtsııadan karantındi buzǵan adamdarǵa qatysty 2271 materıal kelip túsipti. Jalpy somasy 229 377 234 teńgeni quraıtyn 1167 jeke jáne zańdy tulǵa ákimshilik jaýapkershilikke tartylǵan. Buǵan deıin birqatar túngi klýbtar men meıramhanalarǵa qatysty buıryqty oryndamaǵany úshin Nur-Sultan qalasynyń mamandandyrylǵan aýdanaralyq ákimshilik sotyna 7 ákimshilik hattama jiberilgeni habarlanǵan bolatyn. Olar – «SOVA» karaoke-bary, «Janym Sol» karaoke-bary, «Alanya» túngi klýby, «Teqila» laýndj-bary, «Echo» bary, «Zoloto» meıramhanasy. Sanıtarlyq-epıdemıologııalyq baqylaý basqarmasynyń ókilderi sottan olardyń qyzmetin 3 aıǵa deıin toqtata turýǵa ótinim jiberedi. Qaýipsizdikti qamtamasyz etý úshin kóshede jáne kópqabatty úılerdiń aýlalarynda, ásirese oıyn-saýyq mekemeleriniń alańdarynda jáne basqa da azamattardyń jappaı demalatyn oryndarynda patrýlder uıymdastyrylady.

Elorda «qyzyl aımaqtan» shyqqan joq. Bir táýlikte 47 adamnan qaýipti vırýs tabylǵan. Osyǵan baılanysty, aldaǵy jeksenbi kúni saýda-oıyn-saýyq ortalyqtary jumys istemeıdi. Alaıda qala syrtyna shyǵam deýshiler úshin jol ashyq. Bul týraly Densaýlyq saqtaý mınıstrliginiń ókilderimen ótken brıfıngte málim boldy. Sonymen birge mamandar adam qarasy qalyń jerge barmaý, ujymdyq sharaǵa qatyspaý, salqyn tııýdiń aldyn alý jáne quttyqtaý úshin qashyqtan baılanys quraldaryn qoldanýǵa keńes berdi. Málim bolǵandaı, koronavırýsty qaıta juqtyrý deregin anyqtaý úshin klınıkalyq hattamaǵa ózgertýler engizilýi tıis. Al Almaty, Shyǵys Qazaqstan, Qostanaı, Soltústik Qazaqstan, Aqmola, Pavlodar jáne Atyraý óńirleri sary aımaqqa ótti. Mamandar qalǵan oblystardaǵy jaǵdaı turaqty dep otyr. Aıta keteıik, vırýs juqtyrýdyń táýliktegi kórsetkishine baılanysty óńirlerdiń epıdemıologııalyq túsin ár aımaqtyń bas sanıtary belgilep, karantındik sharalardy qatańdatý nemese jeńildetý jóninde sheshimin shyǵarady.

Pavlodar oblysy koronavırýs ınfektsııasynyń taralýy boıynsha «qyzyldan» «jasyl» aımaqqa engendikten, birqatar karantındik shekteýler jeńildetildi. Sala mamandarynyń habarlaýynsha, aımaqta epıdemıologııalyq jaǵdaı turaqtalyp keledi. Oblystyń bas sanıtar dárigeriniń qaýlysyna baılanysty óńirdegi tosqaýyl beketteri alyndy. Qalaaralyq, aýdanaralyq jolaýshylar tasymaly jandanady. Qoǵamdyq kólikterge qatysty lokdaýn da alyndy. Mereke jáne demalys kúnderi avtobýstar men tramvaılardyń jumysy toqtamaıdy. Qoǵamdyq tamaqtaný oryndarynyń jumysy túngi 22:00-ge deıin, saýda oryndarynyń jumysy túngi 23:00-ge deıin uzartyldy. Aımaqta sońǵy táýlikte ınfektsııa juqtyrýdyń 71 deregi tirkeldi. Aqsý qalasyndaǵy qarttar úıindegi jaǵdaı da turaqtalyp keledi. Aýrý juqtyrǵandardyń barlyǵy medıtsınalyq baqylaýda. Ólim-jitim tirkelgen joq.

Qostanaıda da karantınniń shekteý sharalary jeńildedi. Aımaqta jabyq sporttyq nysandardyń jumys isteýine ruqsat berildi. Turǵyndarǵa jeksenbiden basqa kúnderi tańǵy 08:00-den keshki 22:00-ge deıin jattyǵý jasaýǵa múmkindik berildi. Basseınder de jumys isteıdi. Akvapark, monsha, saýda-sattyq oryndary men qoǵamdyq kólikter belgilengen keste boıynsha jumysyn jalǵastyrady. Óńirde qoǵamdyq tamaqtaný oryndarynyń jumys rejımi túngi saǵat 23:00-ge deıin uzartyldy. Al, kınoteatr, oıyn-saýyq ortalyqtarynyń jumysyna tyıym salynǵan.

Al, Atyraý oblysyndaǵy epıdemıologııalyq ahýal ázirge tolyq ońalmaı tur. Sońǵy táýlikte 39 adam qaýipti indetke shaldyqqan. Ázir oblysta karantındik tártip kúsheıtilgen joq. Degenmen, 16-17 jeltoqsan, mereke kúnderi bazarlar men iri saýda núkteleri jumys istemeıdi. Qoǵamdyq tamaqtaný oryndary men azyq-túlik dúkenderi jáne dárihanalar jumysyn jalǵastyrady. Sońǵy eki aptada aýrý juqtyrǵandar sany artty. Kóbi Teńiz kenishindegi jumysshylar arasynan anyqtaldy. Kenishtegi blok-beketti aınalyp kirmek bolǵan 4 adam ustaldy. Ekeýi Reseı azamaty bolyp shyqty. Qujattaryn tekserý barysynda úsh jolaýshynyń, onyń ishinde bir reseıliktiń qolynda PTR-anyqtamasy bolmaǵan.


Bizdiń kanalymyzǵa jazylyńyz:

Bólisińiz:

Avtor:

Álimhan Qanatuly

Uqsas jańalyqtar
Sondaı-aq... oqyńyz
Pikir qaldyrý
+7
Jiberý
ONLAIN QYZMETKERLER
REDAKTOR
Janıbek Amangeldı
Janıbek Amangeldı
954-059
REDAKTOR
Janat Qapalbaeva
Janat Qapalbaeva
954-059

MURAǴAT