Byltyr Qazaqstanda óndiriste jaraqat alǵan 176 adam kóz jumdy
2022 jylǵy 29 maýsym 21:25

Byltyr Qazaqstanda óndiriste jaraqat alǵan 176 adam kóz jumdy

NUR-SULTAN. QazAqparat - Eńbek qyzmetine baılanysty jazataıym oqıǵa kezinde zardap shekkender sany ótken jyly 2 133 adamdy qurady, onyń ishinde 389 adam (18,2%) – áıelder, dep habarlaıdy QazAqparat.

Ulttyq statıstıka bıýrosynyń málimetinshe, zardap shekkenderdiń jalpy sanynan qaza tapqandar sany 176 adamdy qurady, bul 2020 jylǵa qaraǵanda 27 adamǵa kem.

Jaraqattanýdyń eń joǵary kórsetkishi Qaraǵandy oblysynda saqtalyp otyr. 2021 jyly onda 537 jaǵdaı tirkeldi, bul jalpy jaǵdaılardyń 25,2% quraıdy.

Ekinshi orynda Shyǵys Qazaqstan oblysy, onda óndiriste 320 adam jaraqat aldy (jalpy sanynyń 15%).

Toptyq jazataıym oqıǵalarda 240 adam, kásibı aýrý saldarynan – 351 adam, 47 adam ýlanýdan zardap shekti.

Sondaı-aq mas kúıinde 24 adam, esirtki áserinde bolǵan 8 adam qyzmette jaraqat alǵan. Psıhıkalyq aýytqý saldarynan óndiriste 9 adam zardap shekken.

Óńdeý ónerkásibi jaraqat alý qaýpi joǵary sala bolyp otyr, ótken jylǵy jazataıym oqıǵalardyń 26,8% osy salada tirkeldi.

Ekinshi orynda taý-ken óndirý ónerkásibi, onda zardap shekkenderdiń 20,8%-y jumys istegen. Jazataıym oqıǵalar sany eń az sala – aýyl, orman jáne balyq sharýashylyǵy, jaraqat alǵandardyń úlesi – 2,9%-y.

Zardap shekkenderdiń aýyr dárejede jaraqat alǵandar úlesi – 44,6%, ortasha dárejede – 13%, jeńil dárejede 32,5% qurady. Zardap shekkenderdiń 9,9% qaıtys boldy.

Ótken jyly eń kóp taralǵan kásibı aýrýlar: dorsalgııa – spetsıfıkalyq emes arqadaǵy aýyrsyný (200 adam); radıkýlopatııa – nevrologııalyq sındrom (196 adam) jáne dirildiń jáne basqa da syrtqy sebepterdiń áseri (146 adam).


Seriktester jańalyqtary

Jańalyqtar

Úrdis

MURAǴAT