Byltyr AÁK alǵan 51 myń otbasy kedeılik jaǵdaıynan shyqty – mınıstrlik
2022 jylǵy 27 mamyr 15:21

Byltyr AÁK alǵan 51 myń otbasy kedeılik jaǵdaıynan shyqty – mınıstrlik

NUR-SULTAN. QazAqparat – 2021 jyly ataýly áleýmettik kómek alǵan 51 myńnan astam otbasy kedeılik jaǵdaıynan shyqty. Bul týraly QR Eńbek jáne halyqty áleýmettik qorǵaý mınıstrligi Áleýmettik kómek departamentiniń dırektory Asqar Nııazov aıtyp berdi, dep habarlaıdy QazAqparat tilshisi.

Asqar Nııazovtyń aıtýynsha, barlyq eńbekke qabiletti AÁK alýshylardy jumyspen qamtýǵa járdem kórsetilip jatyr. Osylaısha 2021 jyldyń qorytyndysy boıynsha shartty ataýly kómek alatyn 273,4 myń eńbekke qabiletti tulǵalarynyń ishinen 206,5 myń adam jumyspen qamtý sharalarymen qamtylǵan.

«Bıyl elimizde 199,8 myńnan astam adamǵa jumyspen qamtý sharalary boıynsha kómek kórsetý kózdelgen. Onyń ishinde elektrondyq eńbek bırjasy arqyly bos jumys oryndaryna jumysqa ornalastyrý, óz isin ashqysy keletinderge 20 300-den astam grant, jastar praktıkasyna 22 myń joldama, oqý oryndaryn bitirgen jas mamandar úshin 3 myń jumys orny kózdelgen. 36 myń adam biliktilikti arttyrý kýrstarynan óte alady, 16,6 myń ýaqytsha jumys orny, qoǵamdyq jumystarda 52,1 myń ýaqytsha orny qurylady, 8,1 myń adam úshin jumys kúshi az óńirlerge kóshýge sýbsıdııalar beriledi», - dedi A. Nııazov Ortalyq kommýnıkatsııalar qyzmetinde.

Sondaı-aq, 2020 jyly ataýly áleýmettik kómek alǵan 184,7 myń otbasynyń ishinen 47,4 myń otbasy óz ómirin qalypqa keltirý úshin berilgen múmkindikti nátıjeli paıdalanyp, kedeılik jaǵdaıynan shyqqan.

«Bul azamattar qazir ataýly kómek almaıdy almaıdy. Al 2021 jyly AÁK alǵan 198,4 myń otbasynyń 51 400-ge jýyǵy qazir kedeılik jaǵdaıynan shyqty», - dedi Asqar Nııazov.

Aıta keteıik, 1 mamyrdaǵy jaǵdaı boıynsha Qazaqstanda 111,4 myń otbasy nemese 557,1 myń adam 18,8 mlrd teńgege ataýly áleýmettik kómek alǵan. Óńirlik bóliniste 2021 jyldyń qorytyndysy boıynsha AÁK alýshylardyń eń kóp sany Shymkent qalasynda – 47,2 myń otbasy (23,8%), Túrkistan oblysynda – 42,9 myń otbasy (21,7%) jáne Almaty oblysynda – 22,6 myń otbasy (11,4%) baıqalady. AÁK alýshylar sany eń az óńirler – Soltústik Qazaqstan oblysy – 2,7 myń otbasy (1,3%) jáne Atyraý oblysy – 1,6 myń otbasy (0,8%).



Uqsas jańalyqtar

Jańalyqtar

MURAǴAT