BUU Bas hatshysy Qasym-Jomart Toqaevty quttyqtady

NUR-SULTAN. QazAqparat - Birikken Ulttar Uıymynyń Bas hatshysy Antonıý Gýterrısh Qasym-Jomart Toqaevty prezıdent saılaýyndaǵy aıqyn jeńisimen quttyqtady, dep habarlaıdy Aqorda.

BUU-nyń Bas hatshysy Memleket basshysyna tabys tilep, onyń joǵary laýazymdaǵy qyzmeti Qazaqstan halqynyń yrysy men birligin nyǵaıtýǵa baǵyttalatynyna senim bildirdi.

«Sizdi Birikken ulttar uıymynda tájirıbeli de tanymal saıası qaıratker retinde jaqsy bilemiz. Ózińizdi dosymyz dep sanaımyz», - dedi A.Gýterrısh.

Qasym-Jomart Toqaev Antonıý Gýterrıshke quttyqtaǵany úshin rızashylyq bildirip, Qazaqstannyń BUU-men yqpaldastyǵyn odan ári pármendi túrde jalǵastyrýǵa nıetti ekenin aıtty.

Suhbat barysynda ekijaqty yntymaqtastyq pen jahandyq Uıymnyń kún tártibindegi máseleler talqylandy.