Býrabaı TMD-daǵy emdik demalys oryndarynyń úzdik úshtigine endi

NUR-SULTAN. QazAqparat – TýrStat reseılik týrıstik portaly kúzgi saýyqtyrý jáne balneologııalyq demalysqa arnalǵan TMD elderi kýrorttarynyń reıtıngin usyndy, dep habarlaıdy QazAqparat.

Usynylǵan málimetke sáıkes, reseılik týrıster kúzde kóbine Qazaqstan, Belarýs, Ázerbaıjan, Armenııa jáne Moldova elderinde demalady.

2019 jyldyń kúzinde Belarýstiń Naroch kólindegi kýrorttar, Ázerbaıjandaǵy Naftalan, Qazaqstandaǵy Býrabaı kýrorty, Armenııadaǵy Djermýk jáne Moldovadaǵy Kalarash kýrorty TMD elderinde saýyqtyrý demalysyna arnalǵan oryndardyń úzdik bestigine kirdi.

TýrStat deregi boıynsha, adamdar TMD elderi kýrorttarynda kúzde 10 kúnnen 14 kúnge deıin ótkizip, turatyn jeri, tamaǵy jáne emi úshin kúnine 20-21 myń teńge tóleıdi.

Reıtıng TMD elderiniń klımattyq jáne balneologııalyq shıpajaılaryndaǵy kúzgi demalystyń tanymaldylyǵyn taldaý nátıjeleri boıynsha usynylǵan.