Búldirshin qyzdy qutqarǵan Sábıt Shontaqbaev Lokomotıv zaýytyna jumysqa turatyn boldy
2022 jylǵy 11 mamyr 20:12

Búldirshin qyzdy qutqarǵan Sábıt Shontaqbaev Lokomotıv zaýytyna jumysqa turatyn boldy

NUR-SULTAN. QazAqparat - Elorda ákimi Altaı Kólginov 8-qabattyń terezesinen úsh jasar búldirshindi qutqaryp qalǵan Sábıt Shontaqbaevpen ezdesti, dep habarlaıdy QazAqparat.

«Búgin óz ómirin qaterge tige otyryp, 8-qabattyń terezesinen úsh jasar búldirshindi qutqaryp qalǵan Sábıt Shontaqbaevtyń erlikke para-par qadamyna kýá boldyq. Ol elordaǵa osy jyldyń mamyr aıynyń basynda Qyzylordadan kelgen. Sábıtke osyndaı sátte kórsetken erligi men batyldyǵy úshin alǵys aıttym!
Óz tarapymyzdan Sábıttiń otbasyna tıisti kómek kórsetemiz. Bilimi men tájirıbesin eskere otyryp, Lokomotıv zaýytynyń («Lokomotıv qurastyrý zaýyty» AQ) dırektorymen Sábıtti jumysqa ornalastyrý týraly kelistim. Buryn ol osy sala boıynsha QTJ-da jumys istegen, mamandyǵy – vagon sharýashylyǵy. Bul salada tájirıbesi bar» dep jazdy astana ákimi Altaı Kólginov Instagram-daǵy paraqshasynda.

Qala basshysy batyl azamat Sábıtke elordaǵa birjola qonystaný týraly usynys aıtqanyn málimdedi.
«Sol sııaqty búkil otbasyn elordamyzǵa kóshirip ákelý týraly usynys jasadym. Sábıt zaıybymen birge 4 bala (3 ul, bir qyz) ósirip otyr. Jubaıyn jumysqa turýyna, al balalaryn mektepke jáne balabaqshaǵa ornalastyrýǵa kómektesemiz. Osylaısha resmı túrde jumys isteı otyryp, qyzmettik turǵyn úıge úmitker bola alady, sondaı-aq ózge de turǵyn úı baǵdarlamalaryna qatysa alady. Demeýshiler esebinen otbasynyń nesıesin óteýine kómektesemiz, al jazǵy ýaqytta balalaryna Býrabaıǵa joldama beremiz» delingen jazbada.

Sondaı-aq, Altaı Kólginov sóz sońynda qala turǵyndaryn saqtyq sharalaryn tolyqtaı saqtaýǵa, balalaryn qaraýsyz jáne úı terezesin ashyq qaldyrmaýǵa shaqyrdy.

Aıta keteıik, búgin tańerteń elordada qyzylordalyq azamat 8 qabatta terezeden salbyrap turǵan búldirshindi qutqaryp qaldy.
Bul oqıǵanyń vıdeosy jelide keń taralyp, Sábıt Shontaqbaevtyń batyl áreketine kópshilik tánti boldy.
Odan keıin TJ birinshi vıtse-mınıstri general-leıtenant Kúlshimbaev Ibragım Sábıt Shontaqbaevty «Tótenshe jaǵdaıdaǵy erligi úshin» tósbelgisimen marapattady.


Seriktester jańalyqtary

Jańalyqtar

Úrdis

MURAǴAT