Búgin – Jalpyulttyq aza tutý kúni
2022 jylǵy 10 qańtar 00:30

Búgin – Jalpyulttyq aza tutý kúni

NUR-SULTAN. QazAqparat – 10 qańtar Qazaqstan boıynsha Jalpyulttyq aza tutý kúni dep jarııalanǵan, dep habarlaıdy QazAqparat tilshisi.

Eldegi jappaı tártipsizdikter kezinde kóptegen adamnyń qaıtys bolýyna baılanysty QR Prezıdenti Qasym-Jomart Toqaev 10 qańtardy Jalpyulttyq aza tutý kúni dep jarııalady.

Búgin Qazaqstan boıynsha Memlekettik týlardyń barlyǵy tómen túsiriledi. Osylaısha búlik kezinde qaza tapqan beıbit turǵyndar men áskerıler, polıtsııa ókilderi men quqyq qorǵaý qyzmetkerlerine qurmet kórsetiledi.

Keıingi kúnderi bolǵan qaqtyǵystar kezinde qaıtys bolǵan azamattardyń týǵan-týysqandary men otbasylaryna Memleket basshysy Qasym-Jomart Toqaev kóńil aıtqan bolatyn.

«Almatyda sodyr-lańkesterdiń qolynan ákimshilik ǵımarattar ǵana emes, beıbit turǵyndardyń múlkine de zalal keldi. Sondaı-aq júzdegen beıbit turǵyn men áskerı qyzmetshiniń densaýlyǵy men ómirine qater tóndi. Osy tragedııalar kezinde qaıtys bolǵandardyń otbasyna kóńil aıtamyn», - dedi Prezıdent.

Sondaı-aq Memleket basshysy qaskóılikke barǵan adamdardyń bári qatań jazalanatyny aıtty.

«Bizdiń tarıhymyzdaǵy osy bir qıyndyqty tez arada eńseretinimizge eshqandaı kúmán joq. Eń bastysy, bolashaqta mundaı oqıǵalardyń qaıtalanýyna jol bermeý kerek.

Men qurǵan vedomstvoaralyq top sodyrlar men lańkesterdi izdeýmen jáne olardy ustaýmen aınalysady. Olardyń bári qatań qylmystyq jaýapkershilikke tartylady dep azamattarymyzǵa ýáde beremin.

Barsha qazaqstandyqtan ótinerim, saqtyq tanytyp, barynsha qyraǵy bolyńyzdar. Kúmándi adamdardyń qandaı da bir kúdik týdyratyn belsendi áreketin baıqasańyz, quqyq qorǵaý organdary men jedel jelilerge habarlańyzdar», - dedi Q.Toqaev.

Eske salsaq, Mańǵystaý oblysynyń Jańaózen qalasynda bastalǵan beıbit sherýge Qazaqstannyń ózge óńirleri de qosylyp, onyń arty sodyrlardyń ylańyna ulasqan bolatyn. Jaǵdaı ýshyqqandyqtan 5 qańtar kúni Prezıdent Qasym-Jomart Toqaev Almaty qalasy men Mańǵystaý oblysynda tótenshe jaǵdaı rejımin engizý týraly Jarlyqqa qol qoıdy.

Keıin Qazaqstannyń búkil aýmaǵy boıynsha tótenshe jaǵdaı rejımi engizildi.

7 qańtar kúni QR Prezıdentiniń kelisimimen QR Ulttyq qaýipsizdik komıtetiniń tóraǵasy – Respýblıkalyq jedel shtab basshysynyń buıryǵyna sáıkes Qazaqstan Respýblıkasynyń aýmaǵynda terrorıstik qaýiptiń shekti «qyzyl» deńgeıi jarııalandy.

QR Іshki ister mınıstrliginiń sońǵy deregi boıynsha Almatydaǵy oqıǵalarǵa baılanysty sotqa deıingi 125 tergeý bastalǵan. Bul ister kisi óltirý, bılik ókiline zorlyq-zombylyq jasaý, qarýly shabýyl, buzaqylyq jáne urlyq faktileri boıynsha qozǵalǵan.

QR Іshki ister mınıstrligi búlikshilermen qaqtyǵysta qaza tapqan polıtseılerdiń tizimin jarııalady.

Óz mindetin adal atqarǵandar:

Tarazdyq polıtsııa qyzmetkeri kapıtan Slanbekov Rahat Nurbaıuly;

Almaty qalasynyń polıtsııa starshınasy Qambetov Rınat Talǵatuly;

Almaty polıtsııa bóliminiń aǵa serjanty Asylhanov Álen Muhıtuly;

Praporık Erjanov Erbol Tileýbekuly;

Jambyl oblystyq polıtsııasynyń kishi serjanty Almasov Nurbolsyn Ǵanıuly.

QR Ulttyq qaýipsizdik komıteti de qyzmettik boryshyn atqarý kezinde qaza tapqan qyzmetkerlerdiń tizimin jarııalady.

«QR Ulttyq qaýipsizdik komıteti qańtar aıyndaǵy oqıǵalar saldarynan qyzmettik boryshyn atqarý kezinde qaza tapqan ulttyq qaýipsizdik organdary qyzmetkerleriniń otbasylaryna, týǵan-týysqandary men jaqyndaryna qaıǵyryp, kóńil aıtady», - delingen komıtet habarlamasynda.

Qaza tapqan qyzmetkerlerdiń tizimi:

1. QR UQK Shekara akademııasynyń kafedra bastyǵy Andreı Kabdınov;

2. Jambyl oblysy boıynsha Ulttyq qaýipsizdik komıteti departamenti Terrorızmge qarsy ortalyq bóliminiń bastyǵy Dastan Ádilbaı;

3. QR UQK Shekara akademııasynyń aǵa ofıtseri Jandos Jaǵalbaev;

4. ÁQBB kishi jedel ýákili Ádil Núrkenov;

5. QR UQK Shekara akademııasynyń kýrsanty Jaıyq Ádilqan;

6. QR UQK Shekara akademııasynyń kýrsanty Meıirhan Bitim;

7. QR UQK Shekara akademııasynyń kýrsanty Dáýlet Juparbekov.

QR Іshki ister mınıstrliginiń sońǵy deregi boıynsha Almatydaǵy oqıǵalarǵa baılanysty 125 sotqa deıingi tergeý bastalǵan.

«Bılik ókilderine qatysty kúsh qoldaný, buzaqylyq, kisi óltirý, sondaı-aq qaraqshylyq shabýyldar men urlyqtyń barlyq faktileri boıynsha sotqa 125 deıingi tergeý bastaldy. 5 myńnan astam adam ustaldy», - dedi mınıstrdiń mindetin atqarýshy Erlan Turǵymbaev.


Jańalyqtar

MURAǴAT