+7 (701) 759 90 19
USD 426.77 EUR 509.95
RUB 5.89 CNY 66.34
Jańalyqtar

Búgin Reıhstagqa tý tikken kún: Tarıhı sýrette nege Raqymjan Qoshqarbaev joq

2021 jylǵy 30 sáýir 09:40
Bólisińiz:
Búgin Reıhstagqa tý tikken kún: Tarıhı sýrette nege Raqymjan Qoshqarbaev joq

NUR-SULTAN. QazAqparat – Búgin – qazaq batyry Raqymjan Qoshqarbaevtyń Reıhstagqa tý tikken kúni, dep habarlaıdy QazAqparat tilshisi.

Dáleldense de, moıyndalmaǵan shyndyq. Raqymjan Qoshqarbaev pen Grıgorıı Bolatovtyń 1945 jylǵy 30 sáýirde Berlın operatsııasy kezinde kórsetken erligin bir aýyz sózben osylaı sıpattaýǵa bolady.

Al jeńisti sáttiń sımvolyna aınalǵan áıgili sýrette Raqymjan Qoshqarbaevtyń bolmaýy aqparatty ekshep qabyldaýǵa múmkindigi joq adamdardy jıi adastyrady. Sondyqtan sol bir áıgili sýrettiń qysqasha tarıhyna toqtalýdy jón kórdik.

Fotosýret 1945 jyly 2 mamyrda shaıqastar tynyp, Berlındi keńes áskerleri tolyǵymen basyp alǵan kezde túsirilgen. Onyń avtory «TASS Fotohronıka» tilshisi Evgenıı Haldeı bolatyn.

Reıhstag mańyndaǵy qandy shaıqas 28 sáýirde bastalyp, 30 sáýir kúni alǵashqy týdy Raqymjan Qoshqarbaev pen Grıgorıı Bolatov tigedi. Bul fakt Reseı Prezıdenti Vladımır Pýtınge tarıhshy Bolat Asanov joldaǵan hattyń jaýabynda naqty jazylǵan.

«2005 jyly RF Qarýly Kúshteriniń Bas qolbasshysy V.Pýtınniń atyna leıtenant Qoshqarbaevqa qatysty tarıhı ádildikti qalpyna keltirýdi surap jedelhat joldadym. Bir aı degende Reseı Federatsııasynyń Qorǵanys mınıstrligi janyndaǵy áskerı tarıh ınstıtýty arqyly jaýap aldym. Jaýapta: «Áskerı tarıh ınstıtýtynyń qyzmetkerleri tekserý júrgizdi, jerlesińizdiń erligi tolyq rastaldy» dep anyq jazylǵan», - dep eske alady Bolat Asanov.

Al Evgenıı Haldeıdiń sýreti 2 mamyr kúni, Berlın tolyqtaı keńes áskeriniń baqylaýyna ótken tynysh kezeńde túsirilgenin aıttyq.

«Argýmenty ı fakty» gazetiniń saıty bul oqıǵany bylaı sıpattaıdy.

«Berlınge fotograf redaktsııalyq tapsyrma boıynsha kelgen edi. Biraq ol tarıhı sátti túsire alǵan joq. Fototilshi túsirilim ornyna jetkende shaıqas baıaǵyda tynǵan bolatyn. Reıhstagtyń ár tusynda qyzyl jalaýlar ilinip turdy. Al fotografqa tý tigip jatqan sátti beıneleıtin sýret kerek edi. Evgenıı Haldeı ózine birinshi jolyqqan sarbazdardan kómek suraıdy. Olar birden kelisedi. Foto keıipkerleri 8-shi gvardııa armııasynyń jaýyngerleri Alekseı Kovalev (sýrette tý «tikken» sol), Abdýlhakım Ismaılov pen Leonıd Gorıchev edi. Jumysy bitken soń Haldeı týdy jınap alyp, jónine ketedi. Evgenıı Haldeıdiń qyzy Anna Haldeıdiń aıtýynsha, «Tass» redaktsııasyndaǵylar fotosýretti tumardaı qaster tuta qarsy alypty. Fotosýret baspasózge jarııalanar kezde redaktor aıaq astynan basýǵa tyıym salady. Sóıtse, jaýynger Ismaılov eki qolyna eki saǵat taǵyp túsken eken. ıAǵnı, eki saǵattyń biri «soǵys oljasy» edi. Keńes ıdeologııasyna qaıshy áreketti sýretten joıý úshin redaktsııalaýǵa týra keledi.


Sımvolıkalyq sýrettiń birneshe ret redaktsııalanǵan resmı nusqasy

Barlyq qatelikterge qaramastan, fotosýret jaryq kórdi jáne ol birden Jeńis sımvolyna aınaldy. Keıin Evgenıı Haldeı fototilshi retinde Nıýrnberg protsesin de túsirdi».

Taǵy bir derekterde sýrettiń urys bitken soń túsirilgenin jasyrý úshin artqy kórinisterge tútin men bult qosylǵany aıtylady. «RIA Novostıdiń» jazýynsha, túpnusqa sýret qazir Máskeýdegi Evreı mýzeıinde tur. Ony bir kásipker fotograftyń qyzy Anna Haldeıden satyp alyp, mýzeıge syılasa kerek.

Reseıdegi Evreı mýzeıinde turǵan túpnusqa sýret

Raqymjan Qoshqarbaev 1988 jyly 10 tamyzda Almaty qalasynda qaıtys boldy. Al 1999 jyly oǵan QR Prezıdentiniń Jarlyǵymen «Halyq qaharmany» ataǵy berildi.



Bizdiń kanalymyzǵa jazylyńyz:

Bólisińiz:

Avtor:

Esimjan Naqtybaı

Sondaı-aq... oqyńyz
Pikir qaldyrý
+7
Jiberý
ONLAIN QYZMETKERLER
REDAKTOR
Erbol Janat
Erbol Janat
954-059
REDAKTOR
Aıdar Ospanalıev
Aıdar Ospanalıev
954-059

MURAǴAT