Búgin elordada respýblıkalyq «Qazaqstan barysy» týrnıri ótedi
2022 jylǵy 3 shilde 12:04

Búgin elordada respýblıkalyq «Qazaqstan barysy» týrnıri ótedi

NUR-SULTAN. QazAqparat - Búgin elordada respýblıkalyq «Qazaqstan barysy» týrnıri ótedi, dep habarlaıdy QazAqparat tilshisi.

Týrnır «Barys-arena» muz saraıynda elorda ýaqytymen 13:00-de bastalyp, «Qazaqstan» men «Qazsport» telearnalarynan tikeleı efırde kórsetiledi.

Týrnır jeńimpazyna 25 mıllıon teńge aqshalaı syılyq, altyn belbeý jáne altynnan quıylǵan «taıtuıaq» beriledi. Al ekinshi oryn ıegeri 5,5 mıllıon teńge men kúmis belbeý, qola júldeger 1,8 mıllıon teńge men qola belbeýge qol jetkizedi.

Bıylǵy básekege Jambyl oblysynan Beıbit Ystybaev qatysady dep kútilýde. Ol atalǵan týrnırde 2012, 2015 jáne 2016 jyldarda jeńimpaz atanǵan bolatyn. Al eki márte jeńis tuǵyrynan kóringen Aıbek Nuǵymarov bıyl sporttyq mansabyn aıaqtaǵanyn jarııalady. Sondaı-aq, ótken jyly «Qazaqstan barysy» atanǵan Dáýren Nuralınov alǵan jaraqatyna baılanysty jarysqa qatysa almaıtynyn jarııa etti.

Týrnırde bıyl mamandar Muhıt Tursynov pen Elaman Erǵalıev bas júldeden úmitker retinde sanaıdy. Muhıt 2014, Elaman 2017 jyly jeńis tuǵyryna kóterilgen edi. 2019 jáne 2021 jyldarda kúmis júldeger atanǵan Erasyl Qajybaev pen Ǵalymjan Qyryqbaı da qatysady.

Týrnır barysynda barlyǵy 36 balýan synǵa túsedi.

Eske salsaq, budan buryn ulttyq sport túrlerinen «Qyzyljar-2022» festıvali ótti.


Seriktester jańalyqtary

Jańalyqtar

Úrdis

MURAǴAT