Brakonerlermen qaqtyǵysta aýyr jaraqat alǵan ınspektor qaza tapty

ASTANA. QazAqparat - Osydan eki kún buryn 5 kıik atqan brakonerlermen qaqtyǵysta aýyr jaraqat alǵan «Ohotzooprom» ÓB» RMQK ınspektory E.Nurǵalıev qaza tapty. Bul týraly QR AShM resmı ókili Sáken Qalqamanov Feısbýktegi paraqshasynda jazdy, dep habarlaıdy QazAqparat tilshisi.

«Búgin tańerteń «Ohotzooprom» ınspektory Erlan Nurǵalıev ómirden ozdy. Ol 13 qańtar kúni Qorǵaljyn dalasynda aıýandyq tanytqan 3 brakonermen aıqastan keıin ómiri úshin sońyna deıin kúresti. Qaza tapqan azamattyń otbasyna qaıǵyra kóńil aıtamyn. Ol ómiriniń sońyna deıin Qazaq dalasynyń sımvolyna aınalǵan kıikterdi qorǵaý jolyndaǵy boryshyn adal atqardy. Erlan Nurǵalıev syndy ınspektorlardyń kúsh-jigeriniń arqasynda 2015 jyly jappaı qyrylǵan kıik sany 215 myń basqa deıin kóbeıdi», - dep jazdy Sáken Qalqamanov.

Buǵan deıin QR AShM resmı ókili Sáken Qalqamanov Qaraǵandy oblysynda brakonerlerdiń soqqysyna jyǵylǵan «Ohotzooprom» ÓB» RMQK ınspektory E.Nurǵalıevtiń jaǵdaıy óte aýyr ekendigin aıtqan bolatyn.

Onyń janyn aman alyp qalý úshin Astana qalalyq №1 aýrýhanasynyń dárigerleri kúresken edi.