Brakonerlerden 1 tonnaǵa jýyq bekire tárkilendi
2022 jylǵy 11 mamyr 16:26

Brakonerlerden 1 tonnaǵa jýyq bekire tárkilendi

ATYRAÝ. QazAqparat – 1 sáýirden beri zańsyz aınalymnan 17 tonna 993 keli balyq alynǵan. Onyń ishinde 996 keli bekire tuqymdas túrleri men baǵaly balyqtardyń 755 gramm ýyldyryǵy da bar. Bul týraly Jaıyq-Kaspıı oblysaralyq basseındik balyq sharýashylyǵy ınspektsııasynyń resmı ókili Oleg Týshkanov málim etti, dep habarlaıdy QazAqparat tilshisi.

«Atyraý, Batys Qazaqstan jáne Mańǵystaý oblystarynda 1 sáýirden beri «Bekire-2022» keń aýqymdy balyq qorǵaý is-sharasy ótip jatyr. Bul is-sharanyń maqsaty – Jaıyq-Kaspıı sý aıdyndarynda bekire jáne basqa da balyq túrlerin saqtaý, sondaı-aq ýyldyryq shashýy úshin qolaıly jaǵdaıdy qamtamasyz etý. Aktsııa bastalǵannan beri Jaıyq-Kaspıı oblysaralyq basseındik balyq sharýashylyǵy ınspektsııasynyń ınspektorlary quqyq, tabıǵat qorǵaý organdarynyń jáne Shekara qyzmetiniń qyzmetkerlerimen birlesip, tabıǵat qorǵaý zańnamasyn buzýdyń 828 deregin anyqtady. Sonyń nátıjesinde 609 adam ákimshilik jaýapkershilikke tartyldy. Sot organdaryna 39 is joldandy. Brakonerlik, kórineý qylmystyq jolmen tabylǵan múlikti satyp alý nemese satý, sırek kezdesetin jáne quryp ketý qaýpi tóngen janýarlardy zańsyz paıdalaný deregimen 36 qylmystyq is qozǵaldy. Zańnama talabyn buzýshylarǵa 13,3 mln teńge aıyppul salyndy», -deıdi Oleg Týshkanov.

Onyń aıtýynsha, zańsyz balyq aýlaýshylardan 406 balyq aýlaý quraly, 101 sý kóligi tárkilengen. Ózen arnasy men teńiz akvatorııasynan uzyndyǵy 114 shaqyrymǵa jýyq 1 617 balyq aýlaý quraly alynǵan.

Atalǵan aktsııa 31 mamyrǵa deıin jalǵasady.

Eske sala ketelik, budan buryn balyqty zańsyz aýlaǵandarǵa 3 aptada 7,4 mln teńge aıyppul salynǵanyn jazǵan edik.


Uqsas jańalyqtar
Seriktester jańalyqtary

Jańalyqtar

Úrdis

MURAǴAT