Bozymbaev: Tekelide laı kóshkininen zardap shekkenderge baspana beriledi
2022 jylǵy 15 mamyr 23:27

Bozymbaev: Tekelide laı kóshkininen zardap shekkenderge baspana beriledi

TALDYQORǴAN. QazAqparat - Tekelide laı kóshkininen zardap shekkenderge baspana beriledi. Bul jóninde Almaty oblysynyń ákimi Qanat Bozymbaev Twitter-degi paraqshasynda jazdy, dep habarlaıdy QazAqparat tilshisi.

«Búgin Tekelide laı kóshkini júrdi. Birneshe jekemenshik turǵyn úı búlindi. Ókinishke oraı, 2016 jyly týǵan qyz bala qaıtys boldy. Jedel qyzmetter óz jumystaryn júrgizýde. Zardap shekkenderge baspana berilip, kómek kórsetiledi. Marqumnyń jaqyndaryna qaıǵyra kóńil aıtamyn»,- dep jazdy Almaty oblysynyń ákimi.

Búgin túski saǵat 13:00 shamasynda Tekelidegi Qonaev kóshesinde laı kóshkini júrip, bes jastaǵy qyz bala joǵalyp ketti. Keshki saǵat 18.15-te balanyń máıiti laıly úıindi astynan tabyldy.

Almaty oblystyq Tótenshe jaǵdaılar departamentiniń aldyn ala aqparatyna sáıkes, Tekeli qalasyndaǵy laı kóshkini 50 metrge deıin aqty, eni 25 metr, bıiktigi 3,5 metr, kólemi 4375 tekshe metr. Bir jeke turǵyn úı qırady, bir úı balshyqtyń astynda qaldy, turǵyn úılerdiń taǵy tórteýiniń aýlasyna balshyq kirdi jáne Qonaev kóshesin basyp tastady. Qaza bolǵan 5 jasar baladan basqa turǵyndar qaýipsiz jerde.


Uqsas jańalyqtar
Seriktester jańalyqtary

Jańalyqtar

Úrdis

MURAǴAT