Bolashaqtyń dáriger-túlekteri aýyldyq aýrýhanalarda ota jasap júr
2022 jylǵy 17 maýsym 14:14

Bolashaqtyń dáriger-túlekteri aýyldyq aýrýhanalarda ota jasap júr

NUR-SULTAN. QazAqparat - «Bolashaq» halyqaralyq baǵdarlamasynyń túlekteri aýyldyq aýrýhanalarda zamanaýı ádistermen otalar jasaıdy, dep habarlaıdy QazAqparat.

Halyqaralyq baǵdarlamalar ortalyǵynyń málimetinshe, jetekshi sheteldik medıtsınalyq joǵary oqý oryndarda taǵylymdamadan ótken mamandar zamanaýı tehnologııalardy paıdalanyp, kúrdeli kardıo jáne neırohırýrgııalyq otalar jasaıdy. «Bolashaqtyq» dáriger túlekter elimizdiń barlyq óńirinde, sonyń ishinde aýyldyq aımaqtarda da jumys isteıdi. Máselen, otashy-dáriger Marat Berdimuratov Ońtústik Koreıada ǵylymı taǵylymdamadan ótip, Aqmola oblysyndaǵy Aqkól aýdandyq aýrýhanasyna oraldy. Ol shetelde alǵan bilimi arqasynda laparoskopııa ádisin paıdalanyp, zamanaýı hırýrgııalyq operatsııalar jasap júr.

«Ota jasaýdyń zamanaýı ádisiniń birqatar artyqshylyǵy bar, ol – operatsııadan soń asqynýdyń meılinshe azaıtylǵan táýekeli jáne jaraqat alýdyń tómen deńgeıi. Buryn osyndaı otalar oblys ortalyqtarynda jasalatyn. Qazir aýdandyq aýrýhanamyzda jylyna 150-den astam otalar jasaımyz», - dep atap ótti maman.

Onkolog Baǵdat Nurmaǵanbetov te Izraılde bir jyldyq taǵylymdamadan ótken, qazir Qaraǵandy oblysynyń Aqtoǵaı aýdandyq aýrýhanasynda eńbek etedi. Baǵdat onkologııalyq aýrýlardyń aldyn alýdy, isikterdi alyp tastaýdyń mınıınvazıvtik hırýrgııalyq otalaryn, hımıoterapııalyq emdeý sharalaryn júzege asyrady.

«Mınıınvazıvti otalar shaǵyn tesikter arqyly jasalady jáne sonyń arqasynda naýqas tezirek qalpyna keledi. Bul asqynýdyń damý qaýpin aıtarlyqtaı tómendetedi. Oqý barysynda men ártúrli elderden kelgen áriptesterimmen tanystym. Olarmen áli de baılanysyp, paıdaly keńestermen bólisip otyramyz», - dep áńgimeledi Baǵdat Nurmaǵanbetov.

«Bolashaq» baǵdarlamasymen densaýlyq saqtaý salasynda 800-den astam maman daıarlandy. Olardyń basym kópshiligi – tájirıbelik dárigerler. Jalpy, baǵdarlama júzege asyrylǵan 28 jyl ishinde 11 myńnan astam maman daıyndaldy.


Uqsas jańalyqtar
Seriktester jańalyqtary

Jańalyqtar

Úrdis

MURAǴAT