«Bolashaq» stıpendııasyna 1 myńnan astam ótinish qabyldandy
2021 jylǵy 13 tamyz 11:55

«Bolashaq» stıpendııasyna 1 myńnan astam ótinish qabyldandy

NUR-SULTAN. QazAqparat - «Bolashaq» halyqaralyq stıpendııasyn taǵaıyndaý konkýrsyna qujattardy qabyldaý jalǵasyp jatyr. Búginge deıin 1 myńnan astam ótinish túsken, dep habarlaıdy QazAqparat.

Qujattardy qabyldaý 4 mamyrda bastalǵan bolatyn jáne ol 2021 jyldyń 28 qazanyna deıin jalǵasady. Stıpendııalar maýsym, tamyz jáne qarasha aılarynda taǵaıyndalady. Ekinshi taǵaıyndaýǵa – 250, úshinshi taǵaıyndaýǵa 205 stıpendııa beriledi.

Jalpy, 2021 jyly «Bolashaq» baǵdarlamasy boıynsha oqýǵa 1055 stıpendııa bólingen.

Onyń ishinde:

- 555 stıpendııa magıstratýra, rezıdentýra, doktorantýra jáne taǵylymdama baǵdarlamalary boıynsha;

- 500 stıpendııa «ǵalymdar» sanaty boıynsha beriledi.

«Halyqaralyq baǵdarlamalar ortalyǵy» AQ-dan málim etkendeı, «ǵalymdar» sanaty QR Prezıdenti Qasym-Jomart Toqaevtyń tapsyrmasyna sáıkes jyl saıyn 500 ǵalymdy álemniń jetekshi ǵylymı ortalyqtaryna taǵylymdamaǵa jiberý úshin engizilgen.

«Bolashaq» halyqaralyq stıpendııasyn taǵaıyndaýǵa qajetti qujattardy qabyldaý jáne konkýrstyq irikteý protsesteri tolyǵymen avtomattandyrylǵan jáne eGov.kz portaly arqyly júzege asyrylady.

«Jeke kabınette úmitkerge biregeı kod beriledi. Sol kodty ol konkýrstyq irikteý kezinde paıdalanady.

Úmitkerdiń jeke derekteri de biregeı sáıkestendirý júıesiniń kómegimen kodtalǵan. Іrikteý kezeńderine keshendi test, Táýelsiz saraptamalyq komıssııa múshelerimen jeke áńgimelesý jáne shetelde kadrlar daıarlaý jónindegi Respýblıkalyq komıssııa otyrysynda qujattardy qaraý kiredi», - dep atap ótti «Halyqaralyq baǵdarlamalar ortalyǵy» AQ prezıdenti Aınur Káribozova.

Aıta keteıik, 2021 jyly stıpendıattar 80 mamandyq boıynsha akademııalyq oqýǵa baryp, 137 mamandyq boıynsha taǵylymdamadan ótedi. Tizimge «Inklıýzıvti bilim berý», «Vırýsologııa», «Ýrbanıstıka», «Jańa materıaldar tehnologııasy»sııaqty ózekti mamandyqtar endi.

Bıyl basym mamandyqtar «ınnovatsııalar jáne jańa tehnologııalar», «ındýstrııalyq ınjenerııa», «jaratylystaný ǵylymdary», «áleýmettik ǵylymdar», «bilim berý», «medıtsına» jáne «kreatıvti ındýstrııa» sııaqty baǵyttar boıynsha bólingen.


Jańalyqtar

MURAǴAT