«Bolashaq» baǵdarlamasynyń túlegi aýyl mektebinde aǵylshyn tilin úıretedi
2022 jylǵy 24 sáýir 15:09

«Bolashaq» baǵdarlamasynyń túlegi aýyl mektebinde aǵylshyn tilin úıretedi

NUR-SULTAN. QazAqparat - «Bolashaq» baǵdarlamasynyń túlegi Gúlim Batyrǵalıeva Aqmola oblysy Shortandy aýdany Shortandy №3 qazaq orta mektebinde aǵylshyn tili páninen sabaq beredi, dep habarlaıdy QazAqparat.

«Bolashaq» Halyqaralyq ortalyǵynyń málimetinshe, qazirgi tańda Gúlim 6 synyptaǵy 80-nen astam oqýshyǵa til úıretedi.

«Meniń oıymsha, barlyq balada sapaly bilim alýǵa teńdeı múmkindik bolýy tıis. Maqsatym – bilimge degen qyzyǵýshylyqty oıatyp, aýylda oqıtyn balalarǵa aǵylshyn tilinde erkin sóıleýdi úıretý», – deıdi ustaz.

Gúlim Batyrǵalıeva 2021 jyly AQSh-tyń Djordjııa ýnıversıtetinde «Aǵylshyn tili jáne álem tilderin ekinshi shet tili retinde oqytý (TESOL and World Languages)» mamandyǵy boıynsha magıstratýrany támamdady.

2017 jyly AQSh elshiliginiń jalpy bilim beretin mektep muǵalimderine arnalǵan Teaching Excellence and Achievement (TEA ) baǵdarlamasynyń fınalısi boldy.

2021 – 2022 oqý jylynda QR Táýelsizdiginiń 30 jyldyǵyna oraı shyǵarmashylyq jáne ǵylymı tulǵalar arasynda ótken «Qulager» oblystyq konkýrsyna qatysyp, «Úzdik ǵylymı-zertteý jumysy» atalymynda jeńimpaz boldy.

2021 jyly Qazaqstandaǵy aǵylshyn tili muǵalimderiniń biliktiligin arttyrýǵa, muǵalimderdiń onlaın qaýymdastyǵyn damytýǵa baǵyttalǵan British Council jáne «Órleý» pedagogterdiń biliktiligin arttyrý respýblıkalyq ınstıtýtynyń birikken jobasynda jumys jasady. Osy jobadaǵy jumysy boıynsha 2022 jyldyń mamyr aıynda QR delegatsııasy quramynda Ulybrıtanııanyń Belfast qalasynda ótetin IATEFL konferentsııasyna qatysady. IATEFL konferentsııasyna álemniń túkpir-túkpirinen til bilimi, shet tilderin oqytý salasyndaǵy 3 myń ǵalym, spıker, zertteýshi qatysady dep josparlanǵan.

Qazirgi tańda Gúlim «Saýattylyqty arttyrý: bilim alýda qıyndyǵy bar aǵylshyn tilin úırenýshi oqýshylarmen erte ınterventsııa» («Improving Literacy: Early reading intervention for struggling EFL readers») taqyrybynda zertteý jumysyn júrgizip jatyr. Zertteý jumysynyń ózektiligi – pedagog tarapynan oqýda qıynshylyqtary bar oqýshylarǵa ǵylymǵa negizdelgen kómek kórsetý, sebep saldaryn anyqtaý, taldaý, keıs-stadı júrgizý. Keleshekte zertteý jumysynyń nátıjesimen áriptesteri, ata-analar jáne ádiskerlermen bólisýdi kózdep otyr.

Sondaı-aq jas pedagog óz áriptesterine «Bolashaq» baǵdarlamasyna túsý, shetelde oqý múmkindikteri jaıly keńes berip, tálimgerlerlik jumysyn jasap keledi.

«Qazirgi zaman – múmkindikter zamany. Múmkindikke shek joq. Oqımyn, bilemin degen adamǵa jol ashyq. Bilemin, bildim dep emes, áli bilmeıtinim kóp eken dep ómir súr» - degen ustanymyn shákirtterine darytýda.


Uqsas jańalyqtar
Seriktester jańalyqtary

Jańalyqtar

Úrdis

MURAǴAT