«Bolashaq» baǵdarlamasynyń tizimine 40 jańa mamandyq qosyldy
2022 jylǵy 19 sáýir 16:47

«Bolashaq» baǵdarlamasynyń tizimine 40 jańa mamandyq qosyldy

NUR-SULTAN. QazAqparat – Mamandyqtar tizimi eńbek naryǵynyń trendterin taldaý nátıjesinde tolyqtyrylǵan. Bul týraly «Halyqaralyq baǵdarlamalar ortalyǵy» AQ Basqarma tóraǵasy Ánýar Janǵozın jelidegi paraqshasynda jazdy, dep habarlaıdy QazAqparat.

Tizim ınnovatsııalar, jańa tehnologııalar, medıtsına jáne ındýstrııalyq ınjenerııa, jaratylystaný ǵylymdary salasy boıynsha tolyqtyryldy.

«17 mamandyqtyń ataýy keńeıtilip, burynnan bar mamandyqtar qataryna qosylsa, 23-i jańa mamandyq retinde engizilip otyr. Jalpy alǵanda, basym mamandyqtardyń tizimi tehnıkalyq baǵyttaǵy mamandyqtarmen 30%-ǵa keńeıtildi»

, - deıdi Ánýar Janǵozın.

Ortalyq basym mamandyqtardy anyqtaý úshin memlekettik organdar men uıymdardyń joǵary jáne joǵary oqý ornynan keıingi bilimi bar kadrlar qajettiligine qatysty 70-ke jýyq ótinimine taldaý jasaǵan.

«Kadrlyq naryqtyń orta merzimdi boljamy eskerildi. Memlekettik organdar, JOO, ǵylymı ortalyqtar, ındýstrııa jáne bıznes ókilderiniń qatysýymen saraptamalyq kezdesýler ótkizdik»

, - dep jazady ol.

Bıylǵy jyly sheteldik joǵary oqý oryndarynda bilim alýǵa arnalǵan basym mamandyqtar tizimine jalpy akademııalyq oqý boıynsha 92 mamandyq jáne taǵylymdamadan ótýge 158 mamandyq kirdi. Tizimdi «Halyqaralyq baǵdarlamalar ortalyǵy» AQ resmı saıtynan qaraýǵa bolady.

Buǵan deıin «Bolashaq» baǵdarlamasyna álemniń úzdik 23 tehnıkalyq ýnıversıteti kirgen bolatyn.



Jańalyqtar

Úrdis

MURAǴAT