BQO-da jergilikti joldardy jóndeý kezinde 42 buzýshylyq anyqtaldy
2022 jylǵy 5 shilde 14:58

BQO-da jergilikti joldardy jóndeý kezinde 42 buzýshylyq anyqtaldy

ORAL. QazAqparat – Batys Qazaqstan oblysynda jergilikti joldardy jóndeý kezinde 42 buzýshylyq anyqtaldy, dep habarlaıdy QazAqparat tilshisi.

BQO jolaýshylar kóligi jáne avtomobıl joldary basqarmasynyń basshysy Aıdar Meńeevtiń aıtýynsha, jergilikti mańyzy bar joldardaǵy jóndeý barysyna saraptama jasaý kezinde quny 85 mln teńge bolatyn jumystardy qaıta qalpyna keltirýge nusqama berildi.

Atap aıtqanda, «ıÝnıserv» JShS «Barbastaý – Aqjaıyq – Inder» jolynyń 43-93 km (19 mln teńge), «DSK-Prıorıtet» JShS «Aqsaı – Shyńǵyrlaý» jolynyń 51-69 km (55 mln teńge), «Aıdana» JShS «Fedorov – Aqsaı» jolynyń 28-43 km (11 mln teńge) jobasy boıynsha asfalt jamylǵysyn qaıta tóseıdi.

Basqarma basshysynyń aıtýynsha, bıyl jergilikti joldardy jóndeýge 26,7 mlrd teńge bólinip, qazirgi kezde 60 jobany (21-i ótken jyldan aýysqan, 39-y – jańa) júzege asyrý josparlanýda.

Sonyń ishinde «Qýatty óńirler – el damýynyń draıveri» ulttyq jobasy aıasynda respýblıkalyq bıýdjetten 23,8 mlrd teńge qaralsa, jergilikti qazynadan 2,5 mlrd teńge berildi.

A.Meńeevtiń sózine qaraǵanda, osy qarajatqa 350 shaqyrym jergilikti joldy jóndeý kózdelýde. Atap aıtqanda, Barbastaý – Aqjaıyq – Inder (43-93 km), Bórli – Aqsaı – Jympıty (68-139 km), Chapaev – Jańaqala – Saıqyn (130-191 km) joldary qaıta salynyp jatsa, Fedorov – Aqsaı (28-82 km), Tasqala – Aqqýraı – Bolashaq (96-157 km), Aqsaı – Shyńǵyrlaý joldarynda ortasha jóndeý júrgiziledi. 193,3 km aýdandyq mańyzy bar jol jóndeý de josparda.

Bıylǵy qarjylandyrý kólemi aldyńǵy jyldarmen salystyrǵanda, 2-3 ese kóp.

Alty aıdyń qorytyndysy boıynsha 55 joba boıynsha jumystar bastalyp, 70 shaqyrym jol jóndeldi. Qalǵan 5 joba boıynsha konkýrstyq rásimder jalǵasýda.

Oblys joldarynda 12 merdiger uıym (sonyń 10-y – jergilikti) jóndeý jumystaryn júrgizse, sonyń barysyn 10 tehnıkalyq qadaǵalaý uıymdary (barlyǵy jergilikti emes) baqylaýda.

Sonymen qatar 18 asfaltbeton zaýyty, 2 beton zaýyty, 6 temir jol toraby qyzmet kórsetse, jobalarǵa 2 myńǵa jýyq jumysshy tartylǵan.

Basqarma basshysynyń málim etkenindeı, jobalardy júzege asyrý úshin 18 myń tonna bıtým jáne 96 myń tonna qıyrshyqtas kerek. Áıtse de bıtým 1 700 shaqyrym jerdegi Mańǵystaý oblysyndaǵy «CaspiBitum» zaýytynan, al qıyrshyqtas 700-800 shaqyrym qashyqtyqtaǵy Aqtóbe oblysynyń ken oryndarynan temir jol qatynasy arqyly tasymaldanady.

«Qazirgi tańda jergilikti joldardyń 3 733,5 shaqyrymy jóndeýdi qajet etedi. Osy oraıda jobalardyń qunyn arzandatyp, soǵan sáıkes jóndeý jumystarymen barynsha uzaq shaqyrymdardy qamtý kózdelýde. Jobalardy jasaqtaý kezinde jańa tehnologııalar engizilýde. Aıtalyq, topyraqty «Akropol», «ANT», «Nıkoflok» jáne basqa materıaldarmen turaqtandyrý arqyly qıyrshyqtasty paıdalanýda azaıtýǵa mán berilýde. Bul jóndeý qunyn bir shaqyrymǵa shaqqanda 120-150 myń teńgeden 60-70 myń teńgege deıin tómendetýge múmkindik berip otyr. Bul tehnologııa eldi mekenderge kireberis aýdandyq mańyzy bar jáne qarqyndylyǵy tómen oblystyq joldar jobalarynda qoldanylýda», dedi A.Meńeev.

Jol salasyn qarjylandyrý kóleminiń ulǵaıýy merdiger uıymdar arasynda básekelestikti arttyrýda. Ásirese, bul jergilikti merdiger uıymdardyń kóbeıýine septigin tıgizýde. Mysaly, 2012 jylǵa deıin oblysta 4 merdiger uıym bolsa, kúni búgin olardyń sany 12-ge jetti.

«Osyndaı is-sharalar nátıjesinde óńirdegi jergilikti joldardyń jaqsy jáne qanaǵattanarlyq kúıdegi úlesin jyl sońynda 50 paıyzǵa deıin jetkizý kózdelýde», deıdi basqarma basshysy.

Aıta keteıik, BQO boıynsha avtomobıl joldarynyń jalpy uzyndyǵy 6 176,1 shaqyrym bolsa, sonyń 1 414 shaqyrymy – respýblıkalyq, 4 762,1 shaqyrymy – jergilikti joldar. Qazirgi tańda jergilikti joldardyń jaqsy jáne qanaǵattanarlyq kúıdegi úlesi – 39 paıyz nemese 1 857,2 shaqyrym.


Uqsas jańalyqtar
Seriktester jańalyqtary

Jańalyqtar

Úrdis

MURAǴAT