BQO-da sońǵy 2 jylda birde-bir qylmys tirkelmegen aýyldar bar

2022 jylǵy 29 qarasha, 20:18
BQO-da sońǵy 2 jylda birde-bir qylmys tirkelmegen aýyldar bar

ORAL. QazAqparat – BQO-nyń Aqjaıyq aýdany Sarytoǵaı aýyldyq okrýginde sońǵy eki jylda birde-bir qylmys tirkelmegen, dep habarlaıdy QazAqparat tilshisi.

Búgin Oralda óńir turǵyndarymen kezdesken QR Іshki ister mınıstri Marat Ahmetjanovtyń málim etkenindeı, bul – polıtsııa men qoǵamnyń birlesken is-qımylynyń nátıjesi.

Atalǵan okrýgte Janama jáne Sarman aýyldary bar.

Sondaı-aq Syrym aýdany Jetikól aýyldyq okrýgi tolyqtaı ishimdik ishýden bas tartty. Munda dúkenderde araq-sharap satylmaıdy. Qylmys ta joq deýge bolady.

Mundaı oń tájirıbeni el kóleminde taratý qajettigin aıtqan mınıstr oblysta qylmystyq ahýaldyń turaqty ekendigin jetkizdi.

Sonymen qatar sońǵy jyldary mal urlyǵy kásipke aınalyp, uıymdasqan qylmys túri bolyp ketkenine alańdaýshylyq bildirdi. Bıyl óńirde 137 mal urlyǵy deregi (2021 jyly – 134) tirkeldi. Urlanǵan 493 maldyń 264-i tabylyp, ıelerine qaıtaryldy.

Marat Ahmetjanov Batys Qazaqstan oblysynda jol júrý erejesiniń jıi buzylatynyna nazar aýdardy. Ol osy joly áýejaıdan kele jatqan bette júrgizýshilerdiń jol erejesin saqtamaıtynyn óz kózimen kórgen. Osyǵan baılanysty BQO polıtsııa departamenti basshylyǵyna tapsyrma berdi.

Onyń sózine qaraǵanda, oblysta kúre joldardaǵy jaǵdaı kúrdeli kúıinde qalyp otyr. Bıyl 262 jol-kólik oqıǵasy tirkelgen, bul - ótken jylǵydan (243) 8 paıyzǵa kóp. Sonyń saldarynan 80 adam (-5 paıyz, 2021 - 84) qaza taýyp, 311-i (-13, 357) túrli jaraqat aldy.

«Bul másele mınıstrliktiń usynysy boıynsha Úkimet otyrysynda qaraldy. Jol apaty men sodan bolatyn ólim-jitimdi tómendetý baǵytynda tıisti sheshimder qabyldandy. Júrgizýshilerdiń tártibin kóterý úshin jol júrý erejelerin buzýshylyqty tirkeıtin avtomatty kameralar qoldanylýda. Elde osyndaı 17 myń kamera bolsa, Batys Qazaqstanda 94 qana. Bul - az. Sondyqtan muny kóbeıtý kerek. Sonymen qatar jyljymaly statsıonarlyq beketter alýǵa aldaǵy jyly respýblıkalyq jáne jergilikti bıýdjetten qarjy bólinedi dep oılaımyn. Bul baǵytta Úkimet tapsyrmasy bar, ol oryndalýy qajet», dedi mınıstr.

Onyń aıtýynsha, elimizdiń jeti qalasynda (Astana, Almaty, Shymkent, Óskemen, Atyraý, Túrkistan jáne Petropavl) «Qorǵaý» baǵdarlamasy qoldanylýda.

Osy baǵdarlamanyń kómegimen jalǵan nómir paıdalanýdyń 740 deregi, júrgizýshi quqyǵynan aıyrylǵan 2 370 adam anyqtaldy. Sondaı-aq 4 myńǵa jýyq memlekettik nómir alyndy. 12 myńǵa jýyq avtokólik aıyp turaǵyna qoıyldy.

«Osyndaı jumysty Oral qalasynda da bastaý kerek», dedi mınıstr.

Batys Qazaqstanda jol erejesin buzýshylyq 196 myńǵa jetti. 182 myń adamǵa 2 mlrd astam teńge aıyppul salyndy. Mas kúıinde 547 júrgizýshi ustalsa, 1067-si júrgizýshi quqyǵynan aıyryldy. 1424-i ákimshilik qamaqqa alyndy.

«Jol júrý mádenıetin kóterý úshin oblysta qazirgi zamanǵy júıelerdi tezdetip iske qosqan jón» degen Marat Ahmetjanov basqa da ózekti máselelerge toqtalyp, saýaldarǵa jaýap berdi.


Uqsas jańalyqtar
Seriktester jańalyqtary

Jańalyqtar