BQO-da quny 2,5 mlrd teńge turatyn kıik múıizin Reseıge áketpek bolǵandar sottaldy
2022 jylǵy 1 shilde 20:53

BQO-da quny 2,5 mlrd teńge turatyn kıik múıizin Reseıge áketpek bolǵandar sottaldy

ORAL. QazAqparat – Batys Qazaqstan oblysynda quny 2,5 mlrd teńge turatyn kıik múıizin Reseıge áketpek bolǵan turǵyndar sottaldy, habarlaıdy QazAqparat tilshisi.

BQO sotynyń baspasóz qyzmetinen málim etkendeı, Oral qalalyq sotynyń úkimimen K. degen sottalýshy QR QK 339-baby 3-bóligi 2-tarmaǵyna sáıkes aıypty dep tanylyp, Qylmystyq kodekstiń 60-baby 1-bóligi qoldanyla otyryp, 8 jyl 1 aı merzimge bas bostandyǵynan aıyryldy.

Sondaı-aq S. degen sottalýshy QR QK 339-baby 3-bóligi 2-tarmaǵyna sáıkes 7 jyl merzimge bas bostandyǵynan aıyryldy. Oǵan qosa ekeýi de 5 jyl boıy ańshylyq qyzmetpen aınalysa almaıdy.

Sot talqysynda anyqtalǵanyndaı, S. men K. 2021 jyldyń maýsym men shilde aılarynda kıik múıizderin tergeýge belgisiz tásildermen zańsyz ıemdenip, saqtaǵan.

Keıin K. kıik múıizderin S. arqyly Reseıdiń Samara qalasyna tasymaldaǵysy kelip, aqshamen qyzyqtyryp, aldyn ala sóz baılasqan.

Ár aparǵan reısi úshin 500 myń teńge tóleıtinin aıtqan. S. buǵan kelisip, kıik múıizderin zańsyz saqtaý jáne tasymaldaý maqsatynda qurylys materıaldaryn tasýǵa jalǵa alǵan júk kóliginiń astynan temirden dánekerlep, jasyryn qýys jasaǵan.

Sodan soń 14 shilde kúni 1 169 dana kıik múıizin tıep, Samaraǵa jolǵa shyqqanda, Oral qalasy aýmaǵynda polıtsııa qyzmetkerleriniń qolyna túsken.

Azamattyq talap aryz boıynsha sottalǵandardan birlesken tártipte memleket paıdasyna 2 mlrd 526 mln 851,250 myń teńge óndirildi.

Sot úkimi zańdy kúshine endi.

Eske sala keteıik, budan buryn BQO turǵynynyń quny 4,5 mln astam teńge turatyn kıikti tirideı ustap alǵanyn jazǵan bolatynbyz.


Uqsas jańalyqtar
Seriktester jańalyqtary

Jańalyqtar

Úrdis

MURAǴAT