BQO-da kólde joǵalyp ketken 8 jasar bala men onyń atasy ushaqpen izdestirilýde
2022 jylǵy 23 maýsym 04:27

BQO-da kólde joǵalyp ketken 8 jasar bala men onyń atasy ushaqpen izdestirilýde

ORAL. QazAqparat – Batys Qazaqstan oblysyndaǵy Shalqar kólinde aǵys alyp ketken 8 jasar bala ushaqpen izdestirilip jatyr, dep habarlaıdy QazAqparat tilshisi.

BQO TJ departamentiniń baspasóz qyzmetinen alynǵan málimetke qaraǵanda, oqıǵa 22 maýsym kúni saǵat 16.45-te Terekti aýdany Saryómir aýyly mańyndaǵy Shalqar kólinde boldy. Úrlemeli matrasta ata-anasynyń qaraýynsyz qalǵan 8 jasar ul balany jeldiń áserinen aǵys kóldiń ortasyna qaraı alyp ketken. Ony qutqaramyn dep 1957 jylǵy atasy umtylǵan.

Terekti aýdany tótenshe jaǵdaılar bóliminiń bastyǵy Jaras Kópjasarovtyń aıtýynsha, atasy men nemeresin izdeýge Shalqar kólindegi qutqarý beketinen 5 adam bir qaıyqpen shyqqanymen, nátıje bermedi.

«Sodan keıin izdestirý jumystaryna «QazAvıaQutqarý» AQ ushaǵy qosyldy. Saǵat 23.00-de er adamdy qutqarýshylar men týystary tapty, jaǵdaıy qanaǵattanarlyq. Balany izdestirý jumystary jalǵasýda», - dedi J.Kópjasarov.

TJ departamentinen málim etkenindeı, sondaı-aq 22 maýsym kúni Aqsaı qalasynda keshkisin taǵy bir oqıǵa oryn aldy. Saǵat 20.08-de Araltal shaǵynaýdany mańynda 1982 jylǵy er adam Shyńǵyrlaý ózenine batyp ketken. Munda da qutqarýshylar izdestirý jumystaryn júrgizýde.

Eske sala keteıik, budan buryn Oralda segizinshi qabattan terezede turǵan 2,5 jastaǵy bala qutqarylǵanyn jazǵan bolatynbyz.


Seriktester jańalyqtary

Jańalyqtar

Úrdis

MURAǴAT