BQO-da Bókeı ordasy aýdanyna aparatyn jol qurylysy bıyl bite me – mınıstr jaýap berdi
ORAL. QazAqparat – QR Indýstrııa jáne ınfraqurylymdyq damý mınıstri Marat Qarabaev Batys Qazaqstan oblysyna jumys sapary barysynda turǵyndarmen kezdesip, suraqtaryna jaýap berdi, dep habarlaıdy QazAqparat tilshisi.
BQO qoǵamdyq keńes tóraǵasy, oblystyq máslıhat depýtaty Erbol Salyqov respýblıkalyq mańyzy bar Ónege-Bısen-Saıqyn baǵytyndaǵy jol qurylysyna qatysty saýal qoıdy.
«Shalǵaıda ornalasqan Bókeı ordasy aýdanyn oblys ortalyǵymen baılanystyratyn atalmysh baǵyttaǵy jol qurylysy bıyl bitedi degen resmı málimet bar, sony rastaısyz ba? Ekinshiden, Han ordasy aýylymen jalǵastyratyn 21 shaqyrym jolǵa jobalyq-smetalyq qujattama jasalǵanymen, merzimi ótip ketken. Osyny tezdetip jasap, qurylys bastaýǵa kómektesseńiz», dedi E.Salyqov.
Osyǵan oraı jaýap bergen mınıstr Úkimet tarapynan jol qurylysyna jetkilikti qarjy berilip otyrǵanyn jetkizdi. Aıtalyq, ótken jyly Batys Qazaqstan oblysyna osy maqsatqa 42 mlrd teńge qaralsa, bıyl 50 paıyzǵa kóbeıip, 66 mlrd teńgege jetti. Sonyń ishinde Kaztalov-Ónege-Bısen joly qurylysyna 30 mlrd teńge bólindi. Mundaı kólemdegi qarjy qaralǵan emes.
«Qajetti qarajat bólingennen keıin jumystyń tıimdi oryndalýyn mınıstrlikpen qatar jergilikti atqarýshy organdarmen birge qadaǵalaýy kerek. Qosymsha merdiger qajet bolsa, aıtyńyzdar. Han ordasyna jetkizetin 21 shaqyrym jol qurylysyn kelesi jyly bastap ketý úshin bıyl konkýrs ótkizip, merdigerdi anyqtap qoıý kerek», dedi Marat Qarabaev.
«Atalmysh jol qurylysyna qatysty aıtarym, biz oblys ákimdigimen bıyl astyńǵy tósemdi bitirip, joldy qatynas úshin ashýǵa keliskenbiz. Ústińgi tósem kelesi jyly aıaqtalady. Osy sapar barysynda atalǵan jol qurylysy barysymen tanysyp, áli de naqtylaı túsemiz», dedi QR Indýstrııa jáne ınfraqurylymdyq damý mınıstrligi Avtomobıl joldary komıtetiniń tóraǵasy Tólegen Abdýllın.
Eske sala keteıik, budan buryn Bókeı ordasy men Jánibek baǵytyndaǵy jol qurylysy 2023 jyly aıaqtaý kózdelip otyrǵanyn jazǵan bolatynbyz.
