+7 (701) 759 90 19
USD 425.71 EUR 495.53
RUB 5.99 CNY 66.56
Jańalyqtar

BQO ákimi: Kásipkerlerge barynsha qolaıly jaǵdaı jasaý - ortaq mindet

2014 jylǵy 26 maýsym 15:18
Bólisińiz:
BQO ákimi: Kásipkerlerge barynsha qolaıly jaǵdaı jasaý - ortaq mindet

ORAL. QazAqparat - Kásipkerlerge, sonyń ishinde mal sharýashylyǵymen aınalysatyndarǵa barynsha qolaıly jaǵdaı jasaý - ortaq mindet. Bul týraly Qaratóbe aýdanynda jumys saparymen bolǵan kezinde keshe aýyl sharýashylyǵy salasy qyzmetkerlerimen kezdesýde oblys ákimi Nurlan Noǵaev málim etti.

Ákimniń atap ótkenindeı, «Agrobıznes - 2020» baǵdarlamasy boıynsha túıtkildi máseleler joq emes. Máselen, nesıeleýge qatysty kedergilerdi jasyrýǵa bolmaıdy. Nesıe berýshi adamdardyń da kemshiligin qaımyqpaı, ashyq aıtý kerek. Eshkim kókten salbyrap túsken joq. Árkimniń jumys orny da ákeden qalǵan mura emes. Jumysta eń aldymen kásibılik basty orynda bolýy tıis. «Buryn ata-babalarymyz tórt túlik maldan kende bolǵan joq. Óris malǵa tolsa, úı janǵa tolady. Bárin memleket jasaıdy eken dep kútip otyrýǵa bolmaıdy. Árkim de myńǵyrtyp mal ósirip, odan tabysyn aıyra alady. Bir mysal keltire keteıin. Jýyrda aýdandardy aralap júrgende, bir fermada boldyq. Onda bir-birine týys bolyp keletin aǵaıyn adamdar jumys jasaıdy eken. Bári birigip úlken mal qorasyn salýda. Sondaǵy bir jumysshy buryn bos otyrǵanyn, jaqynda kiriskenin aıtty. Jaǵdaı jasalǵan, sonyń biri óz malyn baǵýǵa da bolady eken. «Óz malyń qansha?» dep edim, «100 bas sıyr» dep jaýap berdi. Sonda ol qalaısha jumyssyz sanatynda bolady, muny da naqtylaý kerek. Qoryta kele aıtarym, dala tósin malǵa toltyrýǵa bolady. Osy oraıda Qaratóbe aýdanynda mal sharýashylyǵyn órkendetýge barlyq jaǵdaı bar. Aýdanǵa tabıǵı gaz jelisi tartylǵan, sapaly sýy kelip tur. Jol da jóndelý ústinde. Endeshe, ne turys bar, tek alǵa basý kerek. Jalpy, aýdan qaı sala boıynsha da jaqsy damyp keledi», - dedi ákim.

Óńir basshysy sapar barysynda birqatar áleýmettik nysandarǵa at basyn tiredi. Aldymen Qaratóbe aýylyndaǵy memlekettik «Aqbulaq» baǵdarlamasy boıynsha aýylishilik sý qubyry jelisi jumystarymen tanysty. Jobalyq-smetalyq quny 230 mln. teńgeni quraıtyn qurylys jumystaryn «Energııa HHІ veka» JShS júrgizýde. Qurylysta 39 adam jumys jasaıdy. Onyń syrtynda qosymsha 13 jergilikti turǵyn jumysqa tartylǵan. Qubyrdyń aıaqtalý merzimi bıylǵy qazan aıyna belgilengen.

Oblys basshysy Jympıty-Qaratóbe avtokólik jolyn qaıta jańǵyrtý jáne kúrdeli jóndeý jumystarynyń júrý barysyn kórdi. Oǵan 1 mlrd. 399 myń teńge qarajat bólingen. Bul qarjy 80-87 shaqyrym aralyǵyn qaıta jańǵyrtý jáne 87-103 shaqyrym aralyǵyn kúrdeli jóndeý jumystaryna baǵyttalyp otyr. Bul jumystardy oblystyq jolaýshylar kóligi jáne avtomobıl joldary basqarmasynyń tapsyrysy negizinde «ASFA» JShS men «Vıks plıýs» JShS atqarýda.

Aýdan ákimi Ashat Shaharovtyń málimdegenindeı, aýdanda úlgi jobadaǵy dene shynyqtyrý-saýyqtyrý kesheni de salynbaqshy.

Nurlan Noǵaev Aqqozy aýyldyq okrýgine de at basyn buryp, ondaǵy «Satybaldy» sharýa qojalyǵynyń tynys-tirshiligine qanyqty. Aqqozylyq Sabyr Іzimuly jetekshilik etetin sharýa qojalyǵy 2002 jyly qurylǵan. Qojalyq ıeliginde alǵashqyda 250 gektar jer telimi bolsa, 2007 jyly sharýashylyqtyń ósip-órkendeýi negizinde memleketten qosymsha 5 myń gektar jer telimin aldy. Sharýashylyqtyń negizgi baǵyty asyl tuqymdy qazaqtyń aq bas sıyryn ósirý bolyp tabylady. Qazirgi tańda munda 680 bas iri qara, sonyń ishinde 430 analyq, 270 buzaý bar. Onyń ishinde 270 buzaýdyń 214-i - asyl tuqymdy sharýashylyqtyń tól ónimi. Aǵymdaǵy jyly óz ónimi esebinen 40 bas asyl tuqymdy buqashyqtardy ózge sharýashylyqtarǵa satyp, tabys taba bildi. Qojalyq ótken jyldyń aıaǵynda Reseıden 100 bas qazaqtyń aq bas asyl tuqymdy iri qarasyn satyp aldy.

Jalpy, aýdannyń aýyl sharýashylyǵy maqsatyndaǵy jer kólemi - 249 myń gektar, sonyń ishinde shabyndyq 11500 gektar, jaıylym 229500 gektardy quraıdy. Tirkelgen 220 aýyl sharýashylyǵy qurylymdarynyń 11-i - zańdy tulǵa, 209-y - sharýa qojalyqtary.

Bizdiń kanalymyzǵa jazylyńyz:

Bólisińiz:

Avtor:

Eljan Eraly

Sondaı-aq... oqyńyz
Pikir qaldyrý
+7
Jiberý
ONLAIN QYZMETKERLER
REDAKTOR
Janat Qapalbaeva
Janat Qapalbaeva
954-059

MURAǴAT