Bıylǵy Kann festıvaliniń jeńimpazdary belgili boldy
2022 jylǵy 29 mamyr 18:18

Bıylǵy Kann festıvaliniń jeńimpazdary belgili boldy

NUR-SULTAN. QazAqparat – 75-shi Kann festıvaliniń bas júldesin Rýben Estlýndtiń «Qaıǵy úshburyshy» fılmi jeńip aldy. 2017 jyly shved rejısseri «Kvadrat» kınokartınasy úshin «Altyn palma butaǵynyń» ıegeri atanǵan bolatyn, dep habarlaıdy QazAqparat Euronews agenttigine silteme jasap.

Ońtústikkoreıalyq akter Son Kan-ho japon rejısseri Hırokadzý Koreeda túsirgen «Broker» kartınasyndaǵy jumysy úshin úzdik er adam rólin somdaýshy atandy.

Shved rejısseri Álı Abbasıdiń «Qasıetti órmekshi» fılmindegi jumysy úshin Iran aktrısasy Zahra Amır-Ebrahımıge úzdik áıel róli syılyǵy berildi.

«Eýropalyq kınonyń amerıkalyq nemese anglosakson kınolarynan aıyrmashylyǵy týraly aıtatyn bolsaq, maǵan birinshisi unaıtynyn atap ótkim keledi. Óıtkeni onda biz árqashan da qoǵamdy tolǵandyratyn máselelerge nazar aýdaramyz. Eýropalyq kınolarda biz qoǵamdy qalaı jaqsartýǵa bolatynyn, onyń bizge nesi unamaıtynyn, neni ózgertý kerektigin aıtamyz. ıAǵnı, kınematograf – bir nárseni jaqsartýdyń ádisi, quraly. Óıtkeni, birdeńeni ózgertýge nemese jaqsartýǵa nıet bolmasa, fılm túsirýdiń máni joq. Mine, Eýropa kınosy osyndaı», - dedi shved rejısseri Rýben Estlýnd.

«Qaıǵy úshburyshy» – «Tıtanıktiń» aýyr taǵdyryn kútip turǵan sándi kemeniń asa baı ári yqpaldy jolaýshylarynyń apatqa ushyraǵany beınelengen satıralyq drama.

Fılm – Shvetsııa, Germanııa, Túrkııa jáne Frantsııanyń birlesip jasaǵan týyndysy.

«Kann kınofestıvali óziniń 75 jyldyǵyn keń kólemde atap ótti, sonymen qatar búkil álem fılmderiniń kórsetilýi arqyly kınonyń úlken ekranǵa qaıta oralýyn atap ótti. Biraq 2022 jylǵy kıno festıvalinde Eýropa men eýropalyq kıno erekshe qurmetke ıe boldy. «Altyn palma butaǵy» shvedtik Rýben Estlýndtyń «Qaıǵy úshburyshy» fılmine berildi. Gran-prıdi «Jaqyn» kınokartınasy úshin belgııalyq rejısser Lýkas Dont pen «Shańqaı tústegi juldyzdar» fılmi úshin frantsýz Kler Denı bólisti», - dedi Euronews jýrnalısi Frederık Ponsar.

Qazylar alqasynyń júldesin eki kartına - belgııalyq rejısserler Sharlotta Vadermersh pen Felıks van Gornıngenniń «Segiz taý» fılmi men polıak rejısseri 84 jastaǵy Ejı Skolımovskııdiń «Ia» fılmi aldy.

Jańalyqtar

MURAǴAT