Bıyl Jambylda 150-ge jýyq adam brýtsellez aýrýyna shaldyqqan

TARAZ. QazAqparat – Jambyl oblysynda jyl basynan beri 147 adam brýtsellez aýrýyna shaldyqqan. Degenmen bul dertti juqtyrý kórsetkishi 2010 jylmen salystyrǵanda 255 adamǵa kemigen, dep habarlaıdy QazAqparat tilshisi.

Bul týraly oblys ákimdigi veterınarııa basqarmasynyń eseptik jıynynda aıtyldy. Óńir basshysy Asqar Myrzahmetovke atalǵan basqarmanyń basshysy Ospan Berdııarov oblystyń bıologııalyq jáne tamaq qaýipsizdigin qamtamasyz etý, veterınarııalyq-profılaktıkalyq jáne dıagnostıkalyq is-sharalar josparynyń oryndalýy týraly baıandady.

«Dıagnostıkalyq zertteýlerdi taldaýdyń nátıjesinde maldyń sozylmaly brýtsellez aýrýyna shaldyǵýy jyldan jylǵa tómendep jatyr. 2010-2019 jyldar aralyǵynda saryp aýrýy múıizdi iri qara malynda – 86, ýaq malda – 83 paıyzǵa tómendedi. Sondaı-aq, oblys boıynsha turǵyndardyń bul dertke shaldyǵýy 2010 jylmen salystyrǵanda 255 adamǵa kemip, bıyl 147 boldy», – dedi baıandamashy.

Basqarma basshysynyń aıtýynsha, búginde óńirde veterınarııalyq is-sharalardy 11 kommýnaldyq memlekettik kásiporyn atqarýda. Onda arnaıy orta jáne joǵary bilimdi 887 veterınar maman jumys isteıdi. 2019 jyly epızootııalyq is-sharalardy júzege asyrýǵa respýblıkalyq bıýdjetten 1,5 mıllıard teńge (sýbventsııa) bekitilip, tikeleı aýdandyq bıýdjetterge berilgen. Bul ótken jylǵy deńgeıden 13,3 paıyzǵa artyq. Oblysta epızootııaǵa qarsy josparly is-sharalar aıasynda 13 aýrý túri boıynsha vaktsınatsııa jáne allergııalyq, 23 aýrý túri boıynsha dıagnostıkalyq zertteýler júrgizilýde.

Asqar Isabekuly osy tusta atalǵan máseleni talqylap alý kerektigin aıtyp, basqarma basshysyna birqatar suraqtar qoıdy.

«Keltirilgen derekter qanshalyqty senimdi? Menińshe, basqarma esebi eshqandaı da kúmán týǵyzbaýǵa tıis. Shyn máninde solaı ma?» degen óńir basshysy mal ishindegi saryp aýrýynyń jylma jyl úzilmeı jalǵasyp kele jatqany jospardy aldyn ala naqtylap, jumysty da soǵan sáıkes úılestire almaýdyń aıqyn kórinisi ekenin jetkizdi.

Esepti kezeńde veterınarııalyq talaptardy buzǵan zańdy jáne jeke tulǵalarǵa 9 mıllıon 54 myń 998 teńge kóleminde aıyppul salynypty. Asqar Isabekuly osy oraıda jaýapty mekemelerge iri somada aıyppul salý tetigin engizýdi de usyndy. Oblys basshysy qazyna qarajatyn uqsatyp jumsaýdyń, el ıgiligin eseleýdiń mańyzdylyǵyna aıryqsha toqtalyp, onyń naqty esebi, soǵan oraı jospar-júıesi bolýy kerektigin basa aıtyp, basqarmanyń aldaǵy ýaqytta atqarylar barlyq jumystary ulttyń densaýlyǵy nyǵaıtylýyna, azyq-túlik qaýipsizdigi saqtalýyna baǵyttalýy tıistigin atap ótti.