Bıyl memlekettik granttyń 60%-y tehnıkalyq mamandyqtarǵa bólinedi
2022 jylǵy 24 mamyr 12:59

Bıyl memlekettik granttyń 60%-y tehnıkalyq mamandyqtarǵa bólinedi

NUR-SULTAN. QazAqparat – Bıyl Atyraý men Mańǵystaý oblystaryndaǵy tyǵyz ornalasqan eldimekenderdiń jastary úshin arnaıy memlekettik grant bólinedi. Bul týraly Bilim jáne ǵylym vıtse-mınıstri Qýanysh Erǵalıev málim etti, dep habarlaıdy QazAqparat tilshisi.

«Bıyl 11 sáýir men 13 mamyr aralyǵynda pedagogıka mamandyqtary boıynsha bilim alyp jatqan stýdentter Ulttyq biliktilikti testileýdiń birinshi kezeńinen ótti. Osy jyly 50 ýnıversıtetten 52 myńnan astam stýdent pedagogıka mamandyqtaryn meńgerip shyǵady. Atalǵan stýdentterdiń ishinde 33 myńnan astamy Ulttyq biliktilik boıynsha testileýden ótti. Stýdentterdiń ortasha kórsetkishi 45 baldy quraıdy. Mamandyqtarǵa kelsek, eń tómengi kórsetkish quqyq negizderinde – 30 ball, bıologııa – 40, eńbek jáne dene shynyqtyrý – 40 ball», - dedi Qýanysh Erǵalıev mınıstrlikte ótken apparattyq jınalysta.

Mınıstrdiń orynbasarynyń aıtýynsha, 2022-2023 oqý jylynda memlekettik bilim tapsyrysynyń kólemi 88 myńnan asyp túspek.

«Onyń ishinde bakalavrıat - 73 myń, magıstratýra - 33 myńnan astam jáne doktorantýra - 1890 oryn. Bıyl 42 myńnan astam memlekettik grant nemese 60 paıyzy tehnıkalyq mamandyqtarǵa bólinedi. Sonymen qatar 10 myń grant Atyraý men Mańǵystaý oblystarynyń tyǵyz ornalasqan eldimekenderiniń jastaryna qarastyrylyp otyr. Sondaı-aq, «Serpin» baǵdarlamasy boıynsha 3653 grant bólindi. Odan bólek, 490 grant shetel azamattaryna beriledi. Onyń ishinde 150 grant Ortalyq Azııa elderiniń azamattaryna arnalady jáne 100 grant Islam yntymaqtastyǵy uıymy elderiniń túlekterine qaralǵan», - dedi ol.

Buǵan deıin vıtse-mınıstr JOO túlekterin eńbekpen qamtý jónindegi komıssııanyń jumysyn synǵa alǵan edi.


Uqsas jańalyqtar

Jańalyqtar

Úrdis

MURAǴAT