Bıyl elimizde 45 otbasyn qoldaý ortalyǵy ashylady
2022 jylǵy 24 maýsym 19:52

Bıyl elimizde 45 otbasyn qoldaý ortalyǵy ashylady

NUR-SULTAN. QazAqparat – Jyl sońyna deıin el kóleminde qıyndyqqa tap bolǵan jáne otbasylyq zorlyq-zombylyqtyń zardabyn tartqan áıelder men olardyń balalaryna arnalǵan qoldaý ortalyqtary ashylady. Bul týraly QR Parlamenti Májilisiniń depýtaty, «AMANAT» partııasy janyndaǵy otbasy jáne halyqty áleýmettik qorǵaý máseleleri jónindegi respýblıkalyq qoǵamdyq keńesiniń tóraǵasy Dınara Zakıeva málim etti, dep habarlaıdy QazAqparat tilshisi.

«Búgingi jıynda qıyndyqqa tap bolǵan otbasylarǵa qoldaý kórsetý ortalyqtaryn ashý máselesi kóterilip otyr. Ol ortalyqta otbasylyq zorlyq-zombylyqtyń qurbany bolǵan áıelder men olardyń balalary ýaqytsha ornalastyrylady. 2025 jylǵa deıin elimizde 234 otbasyn qoldaý ortalyǵyn qurý jospary tur. Qazirgi eldegi jaǵdaı bundaı ortalyqtyń aýadaı kerektigin kórsetip otyr. Ortalyqty ashýdaǵy maqsat – túrli qıyndyqqa tap bolǵan otbasyna jan-jaqty qoldaý kórsetý. Onyń ishinde quqyqtyq jáne psıhologııalyq qoldaý da bar. Bizdegi aqparatqa sáıkes búginde 1 mln 45 myń otbasy daǵdarys jaǵdaıynda. Olar túrli baǵyttaǵy qoldaýdy qajet etedi», - dedi Dınara Zakıeva.

Sondaı-aq, Májilis depýtaty ortalyqqa kelgen azamattarmen profılaktıkalyq shara júrgizý arqyly otbasylyq kıkiljińniń aldyn alý múmkindiginiń baryn aıtty.

«Іshki ister mınıstrliginiń deregine sáıkes otbasylyq kıkiljińniń 60 paıyzdan astamy nashar turmys jáne ishimdik ishý saldarynan týyndaıdy. Sonymen qatar resmı málimetke súıensek, 2021 jyly elimizde otbasylyq zorlyq-zombylyqqa qatysty 1022 qylmystyq is tirkelgen. Kúnine shamamen 145 adam otbasynda túrli deńgeıdegi zorlyq-zombylyqqa tap bolady. Ótken jyly ózgeniń quqyǵyna qol suqpaý týraly 81 myń uıǵarym alyndy. Osy oraıda Qazaqstanda otbasynda zorlyq-zombylyq kórgen azamattar men olardyń balalaryn qorǵap, qoldaý kórsetetin ortalyq ábden qajet. Ortalyq negizinen áıelder men balalarǵa arnalady. Ol jerde keshendi qoldaý usynylady. Sol sııaqty jaǵdaı rettelgenshe turady. Bıyl jospar boıynsha 45 ortalyq ashylýy tıis», - deıdi ol.

Onyń aıtýynsha, qazir el kóleminde 31 daǵdarys ortalyǵy jumys istep tur.

Aıta keteıik, búgin elordada «AMANAT» partııasy janyndaǵy otbasy jáne halyqty áleýmettik qorǵaý máseleleri jónindegi respýblıkalyq qoǵamdyq keńestiń ekinshi otyrysy ótti.


Uqsas jańalyqtar

Jańalyqtar

Úrdis

MURAǴAT