Bıyl 23 mln gektarǵa egis egý josparlanǵan
2022 jylǵy 27 mamyr 11:35

Bıyl 23 mln gektarǵa egis egý josparlanǵan

NUR-SULTAN. QazAqparat – Aýyl sharýashylyǵy mınıstrligi bıyl kóktemgi dala jumystaryn júrgizý naýqanyn turaqty baqylaýyna aldy, dep habarlaıdy QazAqparat tilshisi.

«Elimizdiń barlyq oblystarynda jappaı kóktemgi egin egý naýqany júrip jatyr. Jalpy jazdyq egis 23 mln gektarǵa josparlanǵan. Onyń ishinde dándi jáne dándi-burshaqty daqyldar – 15,8 mln gektar, maıly daqyldar – 2,9 mln gektar, kókónis-baqsha daqyldary men kartop – 475,5 myń gektar, jem-shóp daqyldary 3,7 mln gektar aýmaqty qamtıdy. Al qant qyzylshasy, maqta, temeki 141,8 myń gektar alqapqa egiledi», - dep atap ótken Aýyl sharýashylyǵy mınıstrliginen QazAqparatqa bergen málimetinde.

Sonymen qatar vedomstvo mamandary bıylǵy astyq ónimdiligine qatysty naqty derekterdi keltirý áli erte ekenin alǵa tartyp otyr.

«Osy ýaqytta egin túsiminiń boljamy týraly aıtýǵa áli erte dep oılaımyz. Qazirgi kezde barlyq aýyl sharýashylyǵy taýar óndirýshileriniń birinshi kezektegi mindeti barlyq qajetti agrotehnıkalyq is-sharalardy saqtaı otyryp, ońtaıly merzimde kóktemgi dala jumystaryn tabysty júrgizý bolyp otyr. Sonymen qatar, jazǵy ýaqytta egistikterdi hımııalyq óńdeý, daqyldarǵa kútim jasaý jumystary bar. Bul turǵyda jaýyn-shashynnyń deńgeıi de úlken ról atqarady. Kóktem men jazda ósimdikterdiń ósýine jáne vegetatsııasyna áser etetin kóptegen basqa faktorlardy da eskergen jón», - delingen vedomstvo aqparatynda.

Osy oraıda AShM baspasóz qyzmeti kóktemgi dala jumystaryn sátti júrgizý máselesi mınıstrliktiń turaqty baqylaýynda ekenin atap ótti. Ol úshin mınıstrlikte kóktemgi dala jumystarynyń barlyq máselelerin ýaqtyly sheshýge arnalǵan jedel shtab quryldy.


Uqsas jańalyqtar
Seriktester jańalyqtary

Jańalyqtar

Úrdis

MURAǴAT