Bıyl aýyl sharýashylyǵy daqyldary 13,5 myń gektarǵa artyq egiledi
2022 jylǵy 18 qańtar 10:35

Bıyl aýyl sharýashylyǵy daqyldary 13,5 myń gektarǵa artyq egiledi

NUR-SULTAN. QazAqparat – Bıyl aýyl sharýashylyǵy daqyldary 13,5 myń gektarǵa artyq egiledi. Bul týraly búgin Úkimet otyrysynda QR Aýyl sharýashylyǵy mınıstri Erbol Qarashókeev aıtty, dep habarlaıdy QazAqparat tilshisi.

«Іshki naryqta azyq-túlik taýarlarynyń naqty qoljetimdiligin qamtamasyz etý maqsatynda, birinshi kezekte, kóktemgi egis jumystaryn ýaqtyly jáne sapaly júrgizý qajet. Oblystardyń derekteri boıynsha 2022 jyly aýyl sharýashylyǵy daqyldaryn 22,9 mln gektar alańǵa egý josparlanyp otyr. Bul 2021 jylǵy deńgeıden 13,5 myń gektarǵa artyq», - dedi mınıstr.

Onyń atap ótýinshe, ótken jylǵy qurǵaqshylyq, sondaı-aq qosalqy bólshekter, janar-jaǵarmaı, mıneraldy tyńaıtqyshtar men pestıtsıdter baǵasynyń kúrt ósýi aldaǵy kóktemgi egis jumystaryn ýaqtyly daıyndaý jáne sapaly júrgizý úshin eleýli qıyndyqtar týǵyzýy múmkin.

«Agroónerkásiptik keshen sýbektilerin qoldaý jónindegi is-sharalardy júrgizý úshin aýyl sharýashylyǵy daqyldaryn ósirý, onyń ishinde erte pisetin kókónister men áleýmettik mańyzy bar azyq-túlik taýarlaryn óndirý úshin «Keń dala» baǵdarlamasy arqyly respýblıkalyq bıýdjetten fermerlerge jeńildikti kredıt berýdi 140 mlrd teńgege deıin ulǵaıtý pysyqtalýda. Aýyl sharýashylyǵy taýar óndirýshilerin kóktemgi egis jumystaryn júrgizýge arzandatylǵan dızel otynymen qamtamasyz etý máseleleri sheshilýde», - dedi Erbol Qarashókeev.


Jańalyqtar

MURAǴAT