Bıyl astanada 30 jármeńke ótip, onda 7 myń tonna ónim usynyldy - ákim

NUR-SULTAN. QazAqparat – Bıyl bas qalada elimizdiń 14 oblysy 30 azyq-túlik jármeńkesin uıymdastyrdy, dep habarlaıdy QazAqparat tilshisi.

«Elordadaǵy aýyl sharýashylyǵy jármeńkesine elimizdiń barlyq óńirleri belsene qatysty. Bul úshin elorda turǵyndary atynan alǵys aıtamyz. Osy kúnge deıin barlyǵy 30 jármeńke uıymdastyryldy. Onda 7 myń tonnadan astam ónim astanalyqtarǵa usynyldy. Onyń ishinde 700 tonnadan astam et, 300 tonna sút jáne sút ónimderi, 200 tonna kókónis jetkizildi. Jáne baǵa da naryqtan 10-15, keıde 20 paıyzǵa deıin tómen boldy. Búgin eki oblys bıylǵy jármeńke kezeńin aıaqtap otyr. Biz bul praktıkany odan ári jalǵastyramyz. Endigi ýaqytta iri mereke kúnderi aýyl sharýashylyǵy ónimderi jármeńkesi uıymdastyrylady. Atap aıtqanda, 1 jeltoqsan, 16 jeltoqsan jáne jańa jylda ótkizemiz. Maqsat – elorda halqyn jıi tutynatyn azyq-túlik ónimderimen qamtamasyz etý», - dedi Nur-Sultan qalasynyń ákimi Altaı Kólginov.

Qala basshysynyń aıtýynsha, elordada mańyzdy azyq-túliktiń baǵa turaqtylyǵyn saqtap turýda atalǵan jármeńkeler mańyzdy ról atqarady.

«Sondaı-aq, bizde turaqtandyrý qory arqyly osy qazan aıynda 6 myń tonna un satyp alyndy. Ol óz kezeginde elordada nan baǵasynyń óspeýine septigin tıgizedi», - dedi ol.

Aıta ketsek, elordadaǵy «Han-Shatyr» oıyn-saýyq alańynda Aqmola jáne Soltústik Qazaqstan oblystarynyń aýyl sharýashylyq ónim jármeńkeleri ótip jatyr.