Bıyl Almatyda 696 áıel kópbalaly ana atandy
2022 jylǵy 21 sáýir 00:21

Bıyl Almatyda 696 áıel kópbalaly ana atandy

ALMATY. QazAqparat - Almaty qalasynda bıyl kópbalaly analar qatary taǵy 696 áıelmen tolyqty, onyń 318-i áleýmettik járdemaqy alýǵa qyzmetti onlaın rásimdegen. Osy jáne ózge de máseleler týraly «Azamattarǵa arnalǵan úkimet» MK Almaty fılıalynyń baspasóz hatshysy Jańyl Ápetova suhbat barysynda QazAqparat tilshisine aıtyp berdi.

- Elimizde qansha baladan bastap kópbalaly otbasy mártebesin alýǵa bolady, tólenetin járdemaqy mólsheri qandaı?

- Qazir Qazaqstanda tórtinshi bala dúnıege kelisimen kópbalaly otbasy mártebesine ıe bolady. Biraq memleketten tólenetin járdemaqy mólsheri ár túrli.

2022 jyly kópbalaly otbasylarǵa járdemaqy bylaı taǵaıyndalady:

• 4 balaǵa — 49 100 teńge;

• 5 balaǵa — 61 383 teńge;

• 6 balaǵa — 73 666 teńge;

• 7 balaǵa — 85 948 teńge;

• 8 balaǵa — 98230 teńge;

Kelesi ár balaǵa 4 aılyq eseptik kórsetkish mólsherinde aqsha qosylady. Qazir 1 AEK — 3063 teńge.

Búginde bul járdemaqyny 487 myńnan astam qazaqstandyq otbasy alady.

Onyń ishinde 63 437 áıel - «Altyn alqa» jáne 138 571 áıel - «Kúmis alqa» ıegerleri.

Taǵy bir aıta keterlik másele, joǵarydaǵy áleýmettik kómek kópbalaly otbasylardaǵy ár balaǵa jeke-jeke tólenedi degen túsinik qate. Bul aqsha balalary kámelet jasyna tolǵanǵa deıin aıyna bir ret beriledi.

Balalarynyń úlkeni 18-ge tolyp jatsa járdemaqy toqtaıdy. Biraq, eskerer taǵy bir másele bar. ıAǵnı, sol úlkeni kúndizgi bólimge oqýǵa túsip, ózge balalary kámelet jasyna tolmasa, onda járdemaqy 23 jasqa deıin beriledi.

- Kópbalaly otbasylar bul járdemaqyny alý úshin ne isteýi kerek?

- Ótken jyldyń mamyr aıynda qyzmet kórsetý júıesinde ózgerister boldy. ıAǵnı, endi áıelder tórtinshi nemese odan kóp balany týǵan kezde taǵaıyndalatyn kópbalaly otbasylar járdemaqysyn alý úshin HQO-ǵa júginýi mindetti emes.

Memleket barlyǵyn qashyqtan SMS habarlama arqyly rásimdeý múmkindigin jasady. Buryn atalǵan járdemaqyny alý úshin HQO-ǵa baryp, ótinish jazyp, jeke kýálik, balalardyń týý týraly kýálikteri men neke qııý kýáligi sııaqty qujattardy usyný qajet edi.

Endi bári jeńil. Bastysy ózińizdiń Egov qyzmetterin paıdalanýshynyń jeke málimetteri jınaqtalyp, saqtalatyn mobıldi azamattar bazasynda tirkelgenińizdi anyqtaý kerek. Sol kezde kópbalaly otbasy mártebesine ıe boldyńyz degen SMS habarlama keledi.

Habarlamaǵa kelisimińizdi beresiz jáne bank esepshotyńyzdy kórsetesiz. Boldy. Ary qaraı qajetti qujattar avtomatty túrde qaralyp, áleýmettik járdemaqy taǵaıyndalady. Basty maqsat — halyqty barynsha qashyqtyqtan isin bitirýge, ýaqytyn únemdeýge jáne qyzmet kórsetýdi barynsha jeńil, ári tıimdi etýge múmkindik jasaý.

- Mobıldi baza degenimiz ne, oǵan qalaı tirkelemiz?

- Búginde biraz qajetti qujattar men ótinishterdi ár adam uıaly telefondaǵy Egov qosymshasy arqyly júzege asyra alady. Ol úshin eń basty talap — bazaǵa tirkelý. Onyń protsesi de op-ońaı:

Egov.kz portalyna kiresiz. Odan keıin oń jaq tómengi buryshtan «Vırtýaldy assıstent» degendi basasyz. Ary qaraı kamera batyrmasyna basyp, beınetúsirilimge ruqsat beresiz.

Baılanysqa shyqqan operatorǵa jeke kýáligińizdi kórsetip, JSN nómirińizdi, telefon nómirińizdi, telefonǵa kelip túsken bir rettik kodty habarlaısyz. Boldy. Ary qaraı ózińizge qajet qyzmetti onlaın alýǵa tolyqtaı múmkindik beriledi.

Jalpy, osy jyldyń ózinde bir ǵana Almaty qalasynda 696 áıel kópbalaly ana atansa, onyń 318-i áleýmettik járdemaqy alý úshin qyzmetti qashyqtyqtan aldy. Bul halyqtyń onlaın qyzmetke suranysy artyp kele jatqanynyń kórinisi.

Dese de, áli biraz adam bilmeıdi. Sol sebepti qazir qyzmettiń meılinshe jeńildegenin bile júrgen abzal.

- Suhbatyńyzǵa rahmet.


Jańalyqtar

Úrdis

MURAǴAT