Bıyl Almaty oblysynda 200-den astam jasóspirim qyz júkti bolyp qalǵan
2022 jylǵy 18 mamyr 20:21

Bıyl Almaty oblysynda 200-den astam jasóspirim qyz júkti bolyp qalǵan

TALDYQORǴAN. QazAqparat - Bıyl Almaty oblysynda 204 jasóspirim júkti bolǵan. Olardyń jasy 15-17 aralyǵynda, dep habarlaıdy QazAqparat tilshisi.

Mundaı ókinishti statıstıka búgin din, til, etnosaralyq qatynastar, ishki jáne jastar saıasaty máseleleri jóninde turaqty komıssııanyń otyrysynda aıtyldy.

Bul komıssııaǵa Almaty oblystyq máslıhat depýtattary múshe.

«Bıyl 1 mamyrǵa deıin oblysta 204 qyz bala júkti bolǵan. Olar 15-17 jasta. Al byltyrǵy 1 mamyrdaǵy kórsetkish boıynsha olardyń sany 228 jetken. Júkti bolǵan qyzdardyń basym bóligi - kolledjde oqıtyndar»,- dedi Almaty oblystyq ishki saıasat basqarmasy basshysynyń orynbasary Eldar Saparov.

Vedomstvo ókiliniń aıtýynsha, Ulttyq statıstıka bıýrosynyń derekterine sáıkes 2021 jyly Almaty oblysynda NEET sanatyndaǵy jastar sany 21 560 adamǵa jetken. Olardyń bilimi joq. Esh jerge jumysqa ornalaspaǵan.

«Qazir osyndaı jastardy jumyspen qamtý úshin túrli jobalar júzege asyp jatyr. Máselen, Zhas project jobasy bar. Atalǵan jobany iske asyrý úshin respýblıka boıynsha 380,7 mln teńge bólindi. 4 óńirde jalpy 250 shaǵyn grant kózdelgen, onyń ishinde Almaty oblysyna 63 jobanyń árqaısysyna 1 mln teńgeden qarastyrylǵan. Jobaǵa 18 ben 29 jas aralyǵyndaǵy jastar qatysa alady»,- dep tolyqtyrdy Eldar Saparov.

Aıta keteıik, jalpy Almaty oblysynda 14 pen 29 jas aralyǵyndaǵy jastar sany - 391 016. Onyń ishinde aýyldyq jerlerde - 311 508, qalada - 79 508 jas bar.


Jańalyqtar

MURAǴAT