Bıyl 226 kóppáterli úıdi jóndeýge 11,2 mlrd teńge bólinedi
2022 jylǵy 30 maýsym 11:26

Bıyl 226 kóppáterli úıdi jóndeýge 11,2 mlrd teńge bólinedi

NUR-SULTAN. QazAqparat – Bıyl «Nurly jer» baǵdarlamasynyń aıasynda eldegi 226 kóppáterli turǵyn úı jóndeýden ótedi, dep habarlaıdy QazAqparat tilshisi.

Bul týraly QR Indýstrııa jáne ınfraqurylymdyq damý mınıstriniń mindetin atqarýshy Erkebulan Daýylbaev Májilis depýtattarynyń saýalyna joldaǵan jaýabynda aıtty.

«Óńirlerdi damytýdyń 2020 jylǵa deıingi memlekettik baǵdarlamasy (Turǵyn úı-kommýnaldyq sharýashylyǵyn jańǵyrtý baǵdarlamasy) iske asyrylǵan 2011-2015 jyldary kezeńinde kóppáterli turǵyn úılerdi kúrdeli jóndeýge respýblıkalyq bıýdjetten 33,6 mlrd teńge bólinip, 2 338 úı jóndeldi. Baǵdarlamada kózdelgen qarjylandyrý tetigine sáıkes jóndeý jumystary buryn jóndelgen turǵyn úılerdiń menshik ıeleriniń qaıtarymdy qarajaty esebinen júzege asyrylady. 2012-2019 jyldary qaıtarymdy qarajat esebinen 10,3 mlrd teńge somasyna 501 úı jóndeldi. Osylaısha, kredıt berýdiń revolverlik tetigi jumys isteıdi», - dep jazdy vedomstvo basshysy.

Sondaı-aq, ol jergilikti atqarýshy organdarǵa bıýdjettik kredıtteý tetigi boıynsha Turǵyn úıkommýnaldyq damýdyń 2020-2025 jyldarǵa arnalǵan «Nurly jer» baǵdarlamasy sheńberinde kondomınıým obektisiniń ortaq múlkine kúrdeli jóndeý júrgizýge eki jyl ishinde 30 mlrd teńge bólý kózdelgenin atap ótti.

«2020-2021 jyldary 520 kóppáterli turǵyn úıdi jóndeýge 18,6 mlrd teńge bólindi. Bıyl 226 kóppáterli turǵyn úıdi jóndeýge 11,2 mlrd teńge bólý josparlanǵan», -delingen Erkebulan Daýylbaevtyń jaýabynda.

Aıta ketý kerek, Indýstrııa ınfraqurylymdyq damý mınıstrligi Qurylys jáne turǵyn úı-kommýnaldyq sharýashylyq ister komıteti tóraǵasynyń orynbasary Baýyrjan Qabdoldyń málimeti boıynsha, eldegi kóppáterli úılerdiń 90 paıyzdan astamy basqarýdyń jańa formasyna kóship úlgergen.


Uqsas jańalyqtar

Jańalyqtar

Úrdis

MURAǴAT