Jańalyqtar  >

Bıtým jetkizýdi tezdetpesek, onyń qysta qajeti bolmaı qalady – Álıhan Smaıylov

2022 jylǵy 30 qyrkúıek, 20:13
Bıtým jetkizýdi tezdetpesek, onyń qysta qajeti bolmaı qalady – Álıhan Smaıylov

ASTANA. QazAqparat - QR Premer-Mınıstri Álıhan Smaıylov Atyraý oblysyn damytýdyń ózekti problemalaryn sheshý máseleleri boıynsha keńes ótkizdi. QazAqparat bul týraly Úkimettiń baspasóz qyzmetine silteme jasap habarlaıdy.

Keńes barysynda aýyldyq eldi mekenderdi sýmen jabdyqtaý, oblystyq jáne aýdandyq mańyzy bar kópirler men avtomobıl joldaryn salý, kópfýnktsıonaldy medıtsınalyq mekemelerdi (onyń ishide perınataldyq jáne onkologııalyq bólimsheler), káriz-tazartý qurylystaryn rekonstrýktsııalaý, «Bolashaq» zaýytynda jáne sýlandyrý-sýarý kanaldarynda jóndeý jumystaryn aıaqtaý, aýyl sharýashylyǵy qurylymdaryn qoldaý úshin qosymsha qarajat bólý, úsh aýysymdy oqytýdy azaıtý, bilim berý nysandaryn salý jáne ózge de máseleler talqylandy.

Oblys ákimi Serik Shapkenov, Indýstrııa jáne ınfraqurylymdyq damý mınıstri Qaıyrbek Óskenbaev, Energetıka mınıstri Bolat Aqsholaqov, Aýyl sharýashylyǵy mınıstri Erbol Qarashókeev, Oqý-aǵartý mınıstri Ashat Aımaǵambetov, sondaı-aq Ekologııa, geologııa jáne tabıǵı resýrstar vıtse-mınıstri Zúlfııa Súleımenova, Qarjy vıtse-mınıstri Tatıana Saveleva jáne Densaýlyq saqtaý vıtse-mınıstri Jandos Búrkitbaev baıandama jasady.

Indýstrııa mınıstri bıyl jergilikti joldar jelisin salýǵa jáne rekonstrýktsııalaýǵa 13,6 mlrd teńge bólingenin habarlady: qurylys-montajdaý jumystarynyń barlyq túrlerimen 45 km jol qamtyldy. Jyl qorytyndysy boıynsha olardyń normatıvtik jaǵdaıdaǵy úlesin 74% deıin jetkizý josparlanýda.

Premer-Mınıstr joldardyń sapasyn jaqsartý boıynsha jumystardy jedeldetý qajet ekenin atap ótti, qazirgi kezde bul – elimizdegi eń tómen kórsetkishterdiń biri.

«Eger bıtým jetkizýdi tezdetpesek, onyń qysta qajeti bolmaı qalady. Barlyq sheshimder tıisti deńgeıde qabyldandy. Bul máseleni kúndelikti baqylaýǵa alyp, bıtým jetkizýdi jedeldetý qajet», — dedi Álıhan Smaıylov.

Keńesti qorytyndylaı kele, Premer-Mınıstr memlekettik organdarǵa Atyraý oblysynyń ákimdigimen birlesip, qaralǵan barlyq máselelerdi ýaqytyly jáne tolyq pysyqtaýdy tapsyrdy.


Foto: primeminister.kz





Uqsas jańalyqtar
Seriktester jańalyqtary

Jańalyqtar